✮കൽക്കി࿐ (ഭാഗം – 13 ) വിച്ചു [ചെകുത്താനെ സ്നേഹിച്ച മാലാഖ ] 1372

” അച്ചായൻ എന്തിനാ ഇത് അവിടെ എത്തിക്കാൻ പറഞ്ഞത് …. സത്യത്തിൽ ഇതെന്താ സാധനം … അച്ചായന് ഇതെവിടെന്നാ …. ? ”

പല സംശയങ്ങളും സ്വയം ചോദിച്ചു കൊണ്ട് അവനാ ചെമ്പ് തകിട് തിരിച്ചും മറിച്ചും നോക്കി .. ഒടുവിൽ അതിൽ പതിപ്പിച്ചിരിക്കുന്ന ആ ചിത്രത്തിലേയ്ക്ക് തന്നെ അവൻ സൂക്ഷിച്ച് നോക്കി …

” ഒറ്റക്കൊമ്പുള്ള കുതിര …. വെള്ളക്കുതിര …. മ് അത് തന്നെ , പണ്ട് പല പല ചിത്രകഥകളിലും കണ്ടിട്ടുള്ള സൂപ്പർ ഹിറോ അനിമൽ . ഓരോ ഓരോ വട്ടേ …. എന്തേലും ആകട്ടെ … ആദ്യമായി അച്ചായൻ ഒരു കാര്യം ആവശ്യപ്പെട്ടതല്ലേ , അത് സാധിച്ച് കൊടുക്കണം അതിനി എന്ത് തരം വട്ടാണെങ്കിലും … ”

ഒരു പുഞ്ചിരിയോടെ അവൻ സ്വയം പറഞ്ഞു കൊണ്ട് ആ ചെമ്പ് തകിട് ആ പട്ടിൽ തന്നെ പൊതിഞ്ഞ ശേഷം അവൻ ബാഗിൽ തിരികെ വച്ചു .

” ഉറക്കം കളയാൻ വേണ്ടി ഓരോരോ സ്വപ്നങ്ങൾ വലിഞ്ഞ് കയറി വന്നോളും നാശം … ”

മനസ്സിൽ സ്വയം പറഞ്ഞു കൊണ്ടവൻ റൂമിന്റെ ഡോർ തുറന്ന് പുറത്തേയ്ക്കിറങ്ങി …

ശേഷം സ്റ്റെപ്പ് കയറി ടെറസ്സിലേയ്ക്ക് നടന്നു ….. മുകളിൽ കയറിയ അവൻ സൈഡിൽ നിന്ന് ചുറ്റിലും ഒന്ന് കണ്ണോടിച്ചു , ആ വീട് അൽപ്പം ഉയരം കൂടിയ സ്ഥലത്തായതിനാൽ ചുറ്റുമുള്ള സ്ഥലം വ്യക്തമായി കാണാൻ സാധിക്കുമായിരുന്നു . ആ ഇരുട്ടിലും അങ്ങിങ്ങായി തെളിഞ്ഞ് നിൽക്കുന്ന വൈദ്യുതി വിളക്കുകൾ , ഒരു പുഞ്ചിരിയോടെ അവൻ ചുറ്റും നോക്കി നിന്നു …. പെട്ടെന്ന് ഒരു തണുത്ത കാറ്റ് അവനെ തലോടി കടന്നു പോയി . ആ കാറ്റ് ശരീരത്തിലേയ്ക്ക് വീശിയതും ആ കുളിരിൽ അവൻ സ്വയം മറന്ന് കണ്ണുകളടച്ച് നിന്നു …