✮കൽക്കി࿐ (ഭാഗം – 13 ) വിച്ചു [ചെകുത്താനെ സ്നേഹിച്ച മാലാഖ ] 1371

” അനൂ …… എടീ ”

ദക്ഷ ചെറിയ ദേഷ്യം മുഖത്ത് കാണിച്ചു , അത് കണ്ടതും അനുവേഗം വാതിലിനടുത്തേയ്ക്ക് ഓടി .

” എന്നെ നോക്കി പേടിപ്പിക്കണ്ട . ഞാൻ വെറുതെ പറഞ്ഞതല്ല , വേറെ ഒരു നാട്ടിൽ നിന്ന് ഇവിടെ വരെ വന്ന് സ്വയ രക്ഷ പോലും നോക്കാതെ ചേച്ചിയെ രക്ഷിച്ചില്ലേ …. നല്ല പോലെ കണ്ണടച്ച് കിടന്നോ , ചിലപ്പൊ ഇന്നത്തെ സ്വപ്നത്തിൽ ആ മുഖം വ്യക്തമായേക്കും ആ ചേട്ടന്റെ മുഖം …. റ്റാറ്റാ ഗുഡ് നൈറ്റ് …. ”

അനു ഒരു പുഞ്ചിരിയോടെ അത്രയും പറഞ്ഞ് വേഗം വാതില് തുറന്ന് പുറത്തേക്കിറങ്ങി ആ വാതിൽ ചാരിയ ശേഷം തന്റെ റൂമിലേയ്ക്ക് നടന്നു ….

അപ്പോഴേക്കും ദക്ഷുടെ മുഖം ഒരു തരം നാണത്താൽ ചുവന്ന് തുടുത്തിരുന്നു .

” അവള് പറഞ്ഞതിൽ എന്തെങ്കിലും സത്യം കാണുമോ ….? ഏയ് വെറുതെ ഓരോ പൊട്ടത്തരം …. എന്നാലും അയാളിന്നെന്നെ …. വഷളൻ …… ”

അവളതും പറഞ്ഞ് കാണ്ണാടിക്ക് മുന്നിൽ പോയ ശേഷം തന്റെ പവിഴ ചുണ്ടുകളിൽ ഒന്ന് തൊട്ട് നോക്കി …. തന്റെ മുഖത്ത് നാണം വന്ന് നിറയുന്നത് അവൾ കണ്ണാടിയിലൂടെ നോക്കിക്കണ്ടു …

” എനിക്കിതെന്താ പറ്റിയേ …. ? അതും ഇതുവരെ ഇല്ലാത്ത നാണം …. ഞാനിങ്ങനെ ഒന്നുമായിരുന്നില്ലല്ലോ , ഇപ്പൊ എന്താ ഇങ്ങനെ ?
കൈ വിട്ട് പോയോ ന്റെ കണ്ണാ …. ”

അവളതും പറഞ്ഞ് ബെഡിൽ വന്നിരുന്ന ശേഷം തലയണ എടുത്ത് മടിയിൽ വച്ചു …