✮കൽക്കി࿐ (ഭാഗം – 13 ) വിച്ചു [ചെകുത്താനെ സ്നേഹിച്ച മാലാഖ ] 1372

” എന്താ ചേച്ചീ …. ചേച്ചിക്ക് ഈ ചേട്ടനെ അറിയാമോ ? ”

അനു അവളെ കുലുക്കി വിളിച്ചു കൊണ്ട് ചോദ്യം ആവർത്തിച്ചു ……

” അറിയാം . പക്ഷെ ….. ? ”

ദക്ഷ ഒന്ന് പതറി ……

” ചേച്ചി ആ ഫോണിങ്ങ് തന്നേ ഈ ഫോട്ടോ എല്ലാവർക്കും കാണിച്ച് കൊടുക്കട്ടെ അവരൊക്കെ കാണാൻ കൊതിച്ച മുഖമല്ലേ ….. ”

അഭി അതും പറഞ്ഞ് ഫോൺ വാങ്ങാനായി വന്നതും ദക്ഷ വേഗം ഫോൺ മാറ്റിപ്പിടിച്ചു ….

” വേണ്ട തൽക്കാലം ഈ ഫോട്ടോയുടെയും ഇയാളുടെയും കാര്യം ആരും അറിയണ്ട … ”

ദക്ഷ പതർച്ചയോടെ പറഞ്ഞു …

” അത് എന്താ ? ചേച്ചി എന്തോ മറച്ച് പിടിക്കുന്നുണ്ട് , സത്യം പറയുന്നതാ നല്ലത് . ഈ ചേട്ടനെ ചേച്ചിക്ക് എങ്ങനെയാ പരിചയം ഏഹ് . സത്യം പറഞ്ഞില്ലെങ്കിൽ ഫോട്ടോയുടെ കാര്യം ചേച്ചീടെ അച്ഛനോടും വലിയച്ഛനോടും പറയും അപ്പൊ അവര് ചേച്ചിയെക്കൊണ്ട് സത്യം പറയിപ്പിക്കും …… ”

ഉടനെ കുഞ്ഞു വാശിയോടെ പറഞ്ഞു ….

‘ അച്ഛനും അമ്മാവന്മാരും അറിഞ്ഞാൽ തനിക്ക് എല്ലാം തുറന്ന് പറയേണ്ടി വരും . അത് ചിലപ്പൊ അയാളുടെ നാശത്തിലേക്ക് തന്നെ നയിച്ചേക്കാം . പാടില്ല , അയാൾ ഒരു തെറ്റും ചെയ്തിട്ടില്ല . പകരം , അയാൾ അയാളുടെ കടമ നിറവേറ്റി . അയാളെ ഒരിക്കലും ഒറ്റിക്കൊടുക്കാൻ പാടില്ല …. ‘

ഭക്ഷയുടെ ഉള്ളിൽ പല ചിന്തകളും മിന്നി മറഞ്ഞു , എന്തോ മനസ്സിൽ വല്ലാത്ത ഒരു ഭാരം പോലെ . മറ്റൊരു വഴിയും മുന്നിലില്ലാത്ത അവസ്ഥയും .