✮കൽക്കി࿐ (ഭാഗം – 13 ) വിച്ചു [ചെകുത്താനെ സ്നേഹിച്ച മാലാഖ ] 1372

” താൻ പറഞ്ഞ് വരുന്നത് …. ? ”

” അതേടോ ….. ശത്രു എല്ലാം മനസ്സിലാക്കിയോ എന്നൊരു സംശയം . തലക്കുറിയിൽ ഇല്ലാത്ത മൃത്യു ദോഷം ആ കുട്ടിയുടെ തലയ്ക്ക് മുകളിൽ ഇപ്പൊ വന്ന് നിൽക്കുന്നുണ്ടെങ്കിൽ എന്താ മനസ്സിലാക്കേണ്ടത് . മാത്രമല്ല ഇന്നലെ നടന്ന അപകടത്തിൽ പോലും ഒരു അസ്വഭാവികത തോന്നുന്നു …. തനിക്കറിയാമല്ലോ ആ നദി എവിടേയ്ക്കാണ് ഒഴുകുന്നതെന്നും ആരൊക്കെ അവിടെ പാർക്കുന്നുണ്ടെന്നും .
അച്ഛൻ തിരുമേനി പറഞ്ഞതനുസരിച്ചാ അന്ന് അതൊക്കെ ചെയ്തത് , അനർത്ഥങ്ങളൊന്നും സംഭവിക്കാതെ വന്നപ്പൊ സന്തോഷിക്കുകയും ചെയ്തു പക്ഷെ ഇപ്പൊ .

മോളുടെ സമയം തീരെ ശരിയല്ല , പലയിടത്തും ആപത്തുണ്ട് . പ്രധാനമായും മറഞ്ഞിരിക്കുന്ന ആ ശത്രു എല്ലാം അറിഞ്ഞിട്ടുണ്ടെങ്കിൽ പിന്നെ നമ്മളെക്കൊണ്ട് ഒന്നും ചെയ്യാൻ കഴിഞ്ഞു എന്ന് വരില്ല . അവൻ ലക്ഷ്യം നേടാൻ വേണ്ടി എന്തും ചെയ്യാൻ മടി കാണിക്കില്ല , ഏതറ്റം വരെയും അവൻ പോകും . അതുകൊണ്ട് സൂക്ഷിക്കണം , ഒരു കാരണവശാലും മോളെ ഒറ്റയ്ക്ക് പുറത്ത് വിടരുത് . പിന്നെ ഏത് കാലത്തും ധർമ്മവും സത്യവും മാത്രമേ ജയിക്കൂ , അത് അന്നായാലും ഇന്നായാലും ….

ഭയക്കാനായി പറഞ്ഞതല്ല മുൻകരുതൽ വേണം എല്ലാത്തിനും , പിന്നെ ഈശ്വരൻ കൂടെയുണ്ട് . എല്ലാം വിധി പോലെ നടക്കട്ടെ …. പോട്ടെടോ …. ”

അയാൾ അത്രയും പറഞ്ഞ ശേഷം തിരികെ നടന്ന് തന്റെ കാറിലേയ്ക്ക് കയറി .

” രാമാ ……. കവടിപ്പലകയിൽ അവസാനം തെളിഞ്ഞ് വന്നത് കംസനെ കൊല്ലാനായി പിറവിയെടുത്ത മഹാവിഷ്ണുവിന്റെ ശ്രീകൃഷ്ണ അവതാരത്തെയാ , അതൊരു നല്ല സൂചനയാടോ . ”