✮കൽക്കി࿐ (ഭാഗം – 13 ) വിച്ചു [ചെകുത്താനെ സ്നേഹിച്ച മാലാഖ ] 1371

” മാറ്റാരോടും പറയരുതെന്ന് പറഞ്ഞ് ചേച്ചി സത്യം ചെയ്യിച്ചതിന്റെ കാരണം ഇത്ര വലുതാണെന്ന് അറിഞ്ഞില്ല , ഞങ്ങളാരോടും ഒന്നും പറയില്ല …. ”

അഭി ഒരു ചെറിയ ചിരിയോടെ പറഞ്ഞു .
കുഞ്ഞുവിന്റെ നോട്ടം അപ്പോഴും ആ ടേബിളിന് പുറത്തിരിക്കുന്ന കവറിലേയ്ക്ക് തന്നെയായിരുന്നു ….

” പാവമാ ആ ചേട്ടൻ ….. ന്നാലും ആ ദുഷ്ടന്മാർ എന്ത് മാത്രം ക്രൂരതയാ ആ കുടുംബത്തോട് ചേയ്തത് , എനിക്ക് ആ ചേട്ടനെ കാണാൻ കൊതി തോന്നുവാ ….. ”

ശ്രിയ സങ്കടത്തോടെ പറഞ്ഞു …..
ദക്ഷയാകട്ടെ ഒന്നും പറയാതെ മൗനമായിത്തന്നെയിരുന്നു ….

” അയ്യോ ….. സമയം പോയതറിഞ്ഞില്ല കുഞ്ഞു , അഭി മുറികളിലേയ്ക്ക് ചെല്ല് ഇനിയും വൈകിയാൽ അമ്മയോ ചെറിയമ്മയോ ഇങ്ങോട്ട് വരും …. ”

അനു പറഞ്ഞതും അഭിയും കുഞ്ഞുവും ഗുഡ് നൈറ്റും പറഞ്ഞ് മുറിക്ക് പുറത്തേയ്ക്ക് ഇറങ്ങി …..

” കുഞ്ഞു പറഞ്ഞത് പോലെ ചേച്ചിക്കും ആ ചേട്ടനെ കാണാൻ നല്ല ആഗ്രഹം ഉണ്ട് അല്ലേ , എനിക്കറിയാം , ചേച്ചി പറയാതെ തന്നെ ചേച്ചിയുടെ മുഖം എന്നോടത് പറഞ്ഞു . ചേച്ചി പറഞ്ഞതും ഇന്ന് നടന്നതും എല്ലാം തമ്മിൽ എന്തോ ബന്ധമുണ്ടെന്ന് എന്റെ മനസ്സ് പറയുന്ന പോലെ , ചിലപ്പൊ തോന്നലാകും . എന്നാലും ഒന്ന് പറയാം ചേച്ചി അധികം വൈകാതെ ആ ചേട്ടനെ നേരിൽ കാണും അതെന്റെ മനസ്സിൽ തോന്നുന്ന ഒരു തരം ഉറപ്പാ …

അന്ന് ചേച്ചി സൂക്ഷിച്ച് ആ മുഖത്തേയ്ക്ക് നോക്കിയേക്കണം എന്നിട്ട് മുഖത്ത് നോക്കി ചോദിക്കണം താനാണോ എന്നെ സ്വപ്നത്തിൽ വന്ന് ഇടയ്ക്കിടയ്ക്ക് ശല്യപ്പെടുത്തുന്നേ ? എന്ന് …. കേട്ടോ ….. ”