✮കൽക്കി࿐ (ഭാഗം – 13 ) വിച്ചു [ചെകുത്താനെ സ്നേഹിച്ച മാലാഖ ] 1372

ഒരു ചെറു പുഞ്ചിരിയോടെ ആ കുളിരും ഏറ്റ് അവൾ കൈ കൂപ്പി നിൽക്കുകയാണ് ആ കാർമുഖിൽ വർണ്ണന്റെ മുന്നിൽ ….. ആ ചെറിയ ക്ഷേത്രത്തിന് മുന്നിൽ കൈകൂപ്പി നിൽക്കുമ്പോൾ കാതിൽ മുഴങ്ങുന്നത് നിലയ്ക്കാത്ത മണിനാദമാണ് ഒപ്പം എവിടെ നിന്നോ ഒഴുകി വരുന്ന ഒരു ഓടക്കുഴലിന്റെ നാദവും ….. പക്ഷെ അതൊന്നും അവളെ പിന്തിരിപ്പിക്കുന്നില്ല , പകരം കണ്ണുകളടച്ച് ആ വിഗ്രഹത്തെ നോക്കി പ്രാർത്ഥിക്കുകയാണ് തനിക്ക് പോലും അറിയാത്ത തനിക്ക് ഏറ്റുവും പ്രീയപ്പെട്ട ആർക്കോ വേണ്ടി …..

ഒടുവിൽ ഒരു ചിരിയോടെ തന്നെ അവൾ കണ്ണുകൾ തുറന്നു . അവിടെ ആ സ്ഥലത്ത് താൻ മാത്രമേ ഉള്ളൂ , താനും തന്റെ കള്ള കണ്ണനും മാത്രം …. തന്റെ പരിഭവവും ആവശ്യങ്ങളും ആഗ്രഹങ്ങളും ഒരു കൂട്ടുകാരനോടെന്നപോലെ തന്റെ കണ്ണനോട് പറഞ്ഞ ശേഷം അവൾ തിരികെ
നടക്കാനൊരുങ്ങി ആ പച്ചപ്പ് നിറഞ്ഞ നിലത്തിലൂടെ തിരികെ മുന്നോട്ട് …..

തിരികെപ്പോകാനായി തിരിഞ്ഞതും മുന്നിലെ ആ കാഴ്ച കണ്ട് അവർ ഞെട്ടിത്തരിച്ചു നിന്നു . അവളുടെ കാലുകൾ നിലത്ത് ഉറച്ച് പോയത് പോലെ , ഒന്നനങ്ങാൻ കൂടി സാധിക്കാത്ത അവസ്ഥ .

തന്റെ പുറകിലായി അടുത്ത് തന്നെ ഒരു വലിയ പാമ്പ് അതിന്റെ ഫണം വിടർത്തി നിൽക്കുന്നു . . .
ഏത് നിമിഷവും തന്റെ ശരീരത്തിൽ വിഷപ്പല്ലുകൾ താഴ്ത്താൻ തയ്യാറായി ഫണം വിടർത്തി തലയെടുപ്പോടെ നിൽക്കുന്ന ആ വിഷ സർപ്പത്തെ കണ്ടതും ദക്ഷയുടെ ശരീരം വിറയ്ക്കാൻ തുടങ്ങി , ശരീരമാസകലം തണുത്ത് മരവിച്ചതു പോലെ …..

ഇത്രയും നേരം ഈ മരണം തന്റെ തൊട്ട് പുറകിൽ ഉണ്ടായിരുന്നു എന്ന് അവൾ മനസ്സിലാക്കിയതും അവളുടെ ഉള്ളിലെ ഭയം ഒന്ന് കൂടി വർദ്ധിച്ചു …