✮കൽക്കി࿐ (ഭാഗം – 13 ) വിച്ചു [ചെകുത്താനെ സ്നേഹിച്ച മാലാഖ ] 1372

നിര നിരയായി ഒത്തിരി പടിക്കെട്ടുകൾ , ഒടുവിൽ അവ മുഴുവനും കയറി മുകളിൽ എത്തിയ ആദി മുകളിലെ കാഴ്ച കണ്ട് അൽപ്പനേരം അങ്ങനെ നിന്നു …..

മുന്നിലായി പടർന്ന് പന്തലിച്ച പഴക്കം ചെന്ന ഒരു വലിയ ആൽമരം , ഒപ്പം മുന്നിലായി ഒരു വലിയ കൽമണ്ഡപം , അതിനപ്പുറത്തായി രൂപങ്ങൾ കൊത്തിയ കല്ലിൽ നിർമ്മിച്ചിരിക്കുന്ന ഒരു വലിയ ക്ഷേത്രം ….. ആകാശത്ത് വട്ടമിട്ട് പറക്കുന്ന പരുന്തുകൾ ഒപ്പം ക്ഷേത്രത്തിന് പുറത്ത് പുൽമേടുകളിൽ മേഞ്ഞ് നടക്കുന്ന പശുക്കളും …
അതിനൊപ്പം കാതുകളിലേയ്ക്ക് അലയടിച്ചു വരുന്ന ഡമരുവിന്റെ ശബ്ദവും …..

ആ ശബ്ദം വീണ്ടും കേട്ടതും ആദി ചുറ്റും നോക്കി ആ ആൽമരത്തിന് ചുവട്ടിലായി കണ്ണുകളടച്ച് ധ്യാനത്തിലിരിക്കുന്ന ചില ശിവയോഗികൾ , ശരീരം മുഴുവൻ ജഡാനരകൾ , കഴുത്തിൽ രുദ്രാക്ഷം , നെറ്റിയിലും കൈയിലും നെഞ്ചിലുമെല്ലാം ഭസ്മധാരണം ചെയ്തിട്ടുണ്ട് , അരയ്ക്ക് താഴേക്ക് മാത്രം വസ്ത്രധാരണം .
അവരുടെ കയ്യിലിരിക്കുന്ന ഡമരുവിൽ നിന്നാണ് ആ ശബ്ദം പ്രതിധ്വനിക്കുന്നത് .
ഒപ്പം ക്ഷേത്രത്തിന് ചുറ്റും പ്രഭാത ദർശനത്തിനെത്തിയ ആൾക്കാരുടെ തിരക്കും …..

” നീ , വാ ….. ”

രുദ്രൻ അതും പറഞ്ഞ് മുന്നേ നടന്നു പുറകെ ആദിയും …. അവർ ആ ആൽമരം കടന്ന് മുന്നോട്ട് നടക്കാൻ തുടങ്ങിയതും

പെട്ടെന്ന് ഒരു വൃദ്ധനായ ശിവ യോഗി അവന്റെ കയ്യിൽ കയറി പിടിച്ചു .. ഒരു ഞെട്ടലോടെ ആദി തിരിഞ്ഞ് നോക്കിയതും കണ്ണുകളടച്ചിരുന്ന ആ വൃദ്ധൻ വേഗം കണ്ണുകൾ തുറന്നു . ആ സമയം ആദി ചെറുതായി ഒന്ന് ഭയന്നിരുന്നു , അയാളുടെ കണ്ണുകളിലെ തീക്ഷണത അവന്റെ ഭയത്തെ വർദ്ധിപ്പിച്ചു …..