✮കൽക്കി࿐ (ഭാഗം – 13 ) വിച്ചു [ചെകുത്താനെ സ്നേഹിച്ച മാലാഖ ] 1372

” ഹ……. ഹാ ….. ഹ ഹ ……. ഏത് നാട്ടിലേക്ക് ചേക്കേറിയാലും ഒരു നാൾ പിറന്ന മണ്ണിലേക്ക് തിരിച്ചു വരേണ്ടിവരും , അത് പ്രപഞ്ചത്തിന്റെ പൊരുൾ . ഒടുവിൽ നീയും മടങ്ങി വന്നു , അല്ലേ നരസിംഹാ ….. ബന്ധങ്ങളാൾ ബന്ധനസ്ഥനായിരുന്നു നീ , കാലം ആ ബന്ധങ്ങളെ പൊട്ടിച്ചെറിഞ്ഞു അത് അവരുടെ വിധി നിന്റെ തിരിച്ച് വരവിന് അത് ആവശ്യം …. നീ ഇപ്പൊ സ്വതന്ത്രൻ പക്ഷെ നിന്റെ ഹൃദയം മറ്റൊരാൾ ഒരു ചങ്ങല കൊണ്ട് ബന്ധിച്ച് കഴിഞ്ഞിരിക്കുന്നു , ആ ബന്ധനം തകർക്കാൻ നീ അശക്തൻ ….

ചക്രവ്യൂഹത്തിൽ അകപ്പെട്ട അഭിമന്യുവിന്റെ അവസ്ഥയാണ് നിനക്കും വന്ന് ചേർന്നിരിക്കുന്നത് , ഒരു രക്ഷപെടൽ അസാധ്യം . നിന്റെ ജന്മം തന്നെയാണ് അതിന്റെ കാരണവും .

നിന്റെ ഹൃദയം ബന്ധിച്ച ചങ്ങല അതിന്റെ രഹസ്യത്തിലേക്കുള്ള താക്കോൽ നിനക്കിന്ന് തന്നെ കിട്ടും പക്ഷെ ഹ ….. ഹ …. അത് നിനക്ക് ഉപകരിക്കില്ല …… ഹ…… ഹ …… ആ ബന്ധനം പെട്ടെന്ന് മുറിഞ്ഞ് പോകില്ല ….. മരണം , മരണം താൻ എല്ലാത്തിക്കും മുടിവ് ……. ഹ …… ഹ ….. നരസിംഹാ …… ഇപ്പൊ നീ പോ . ”

ആദിയുടെ കണ്ണുകളിലേക്ക് നോക്കി അട്ടഹാസത്തോടെ അയാൾ അത്രയും പറഞ്ഞ ശേഷം അവന്റെ കയ്യിലെ പിടിത്തം വിട്ടു …..
ഭയം നിറഞ്ഞ വല്ലാത്ത ഒരു മാനസിക അവസ്ഥയിലായിരുന്നു അവൻ , നിൽക്കുന്നിടത്ത് നിന്ന് ചലിക്കാൻ കഴിയാത്ത അവസ്ഥ ….

” എടാ …. വാ ….. ”

ഇതൊക്കെ കണ്ട് പരിഭ്രമിച്ച് നിന്ന രുദ്രൻ വേഗം അവനെയും പിടിച്ച് വലിച്ച് അൽപ്പ ദൂരേക്ക് മാറി ….

” എന്താടാ …. അയാൾ എന്താ പറഞ്ഞേ …. ഏഹ് …. ? അല്ല അരാ ഈ നരസിംഹൻ .”

രുദ്രൻ ടെൻഷനോടെ ചോദിച്ചു ….

” അറിയില്ലെടാ …. എനിക്കൊന്നും മനസിലായില്ല . പക്ഷെ അയാളുടെ പിടിത്തം , ആ ശക്തി …. ഒരു വയസ്സന് ഇത്രയും ആരോഗ്യമോ ….? ദേ നോക്ക് എന്റെ കൈ ചുവന്നത് , അയാളുടെ ഒറ്റ കയ്യിലെ പിടിത്തത്തിൽ എനിക്ക് ഒന്ന് അനങ്ങാൻ കൂടി കഴിഞ്ഞില്ല …. അയാൾ എന്താ പറഞ്ഞത് , അതിന്റെ പൊരുൾ എന്താ ….. ? ”