✮കൽക്കി࿐ (ഭാഗം – 21 ) വിച്ചു [ചെകുത്താനെ സ്നേഹിച്ച മാലാഖ ] 832

” ഞാൻ വരുമെടാ തിരികെ , നീ പേടിക്കാതെ … മ് … ഇവിടുന്ന് മാറി നിന്നോ ഞാൻ പോയി വരാം … ”

നരസിംഹൻ കർണനോട് പറഞ്ഞ ശേഷം പതിയെ ആ ഗുഹയ്ക്കകത്തേയ്ക്ക് നടന്നു .. മുന്നോട്ട് നടക്കുന്തോറും സൂര്യന്റെ പ്രകാശം തീരെ കുറഞ്ഞു വരുന്നത് പോലെ , ചുറ്റിലും ഒരു തരം ഇരുണ്ട പ്രകാശം ….
ആ ഇരുട്ടിലൂടെ കണ്ണുകളിൽ തെളിയുന്ന അവ്യക്തമായ കാഴ്ചയുടെ സഹായത്തോടെ അവൻ മെല്ലെ മുന്നോട്ട് നീങ്ങി .

കുറച്ചധികം ദൂരം അങ്ങനെ പതിയെ മുന്നോട്ട് നീങ്ങി .

പെട്ടെന്ന് ….

കാലിൽ എന്തോ തട്ടി അവൻ നിലത്തേയ്ക്ക് മറിഞ്ഞ് വീണു പക്ഷെ അതൊരു കുത്തിറക്കം പോലെയുള്ള സ്ഥലമായിരുന്നു … നിലത്ത് വീണ അവൻ ആ പൊടി മണ്ണിലൂടെ കുറേ ദൂരം ഉരുണ്ട് താഴേയ്ക്ക് നീങ്ങി …. നിലത്തു കൂടി മറിഞ്ഞുരുണ്ട് പോയ അവന് ഒരു പിടിത്തവും കിട്ടിയില്ല ഒന്ന് തടഞ്ഞ് നിൽക്കാനായി … ഇരുട്ടിലൂടെ കുറച്ച് ദൂരം ഉരുണ്ട് നീങ്ങിയതും , പെട്ടെന്ന് ഉയരത്തിൽ നിന്ന് ഒരു ഗർത്തത്തിലേയ്ക്ക് വീഴുന്നത് പോലെയാണവന് തോന്നിയത് വായുവിലൂടെ താഴേയ്ക്ക് വീഴുന്നതു പോലെ … പക്ഷെ അത് വെറുമൊരു തോന്നലായിരുന്നില്ല … ഉയരത്തിൽ നിന്ന് താഴേയ്ക്ക് വീണ സമയം അവന്റെ ഉള്ളിലും ഭയം നിറഞ്ഞ് തുടങ്ങി , കാരണം ഉയരത്തിൽ നിന്ന് താഴെ നിലത്ത് വീണാൽ താൻ മരിക്കും അതുറപ്പ് ….

പക്ഷെ അവൻ ഉയർത്തിൽ നിന്ന് ചെന്ന് വീണത് വെള്ളത്തിലേക്കായിരുന്നു , ഒരു വലിയ നീരുറവ പോലെയുള്ള സ്ഥലം …

വെള്ളത്തിന്റെ അടിത്തട്ടിലേയ്ക്ക് വീണ അവൻ മുറുക്കിയടച്ചിരുന്ന കണ്ണുകൾ മെല്ലെ തുറന്ന് നോക്കി …