✮കൽക്കി࿐ (ഭാഗം – 21 ) വിച്ചു [ചെകുത്താനെ സ്നേഹിച്ച മാലാഖ ] 831

” ഏറ് നക്ഷത്രം …. അപകടം …. ”

ഇന്ദ്ര സേനൻ വേഗം തന്നെ മുന്നിലേയ്ക്ക് തിരിഞ്ഞ് നോക്കി , വീണ്ടും തന്റെ നേരെ ഒന്നിലധികം ഏറ് നക്ഷത്രങ്ങൾ പറന്ന് വരുന്നത് കണ്ട അവൻ വേഗം തന്നെ നിലത്തു കൂടി തലകുത്തി മറിഞ്ഞ് ആ മരത്തിന് പുറകിലൊളിച്ചു , അവന്റെ നെരെ പറന്ന് വന്ന ആ
ഏറ് നക്ഷത്രങ്ങൾ ആ മരത്തിന് വശങ്ങളിലായി തറച്ച് ആഴ്ന്നിറങ്ങി …

വേഗം തന്നെ അവൻ പതിയെ തിരിഞ്ഞ് നോക്കി അതേ സമയം അവന്റെ അടുത്തായി നിലത്ത് ഒരു അമ്പ് വന്ന് പതിച്ചു …. ഉടനെ തന്നെ അവൻ വീണ്ടും മരത്തിന്റെ പുറകിൽ സുരക്ഷിതനായി മറഞ്ഞ് നിന്നു ….

” ശ്ശേ ….. വാൾ വീരന്റെ അടുത്താണല്ലോ .. ആ ഭൂപടം …. ”

അതോർത്തു കൊണ്ട് ഇന്ദ്ര സേനൻ വീണ്ടും തിരിഞ്ഞ് നോക്കി , കുറച്ചപ്പുറത്തായി വീണ് കിടക്കുന്ന വീരൻ അവന്റെ അടുത്ത് നിന്നും അകലെയായിട്ടാണ് ആ ഭൂപട ചിത്രം വീണ് കിടക്കുന്നത് , മറു ദിശയിൽ തന്റെ ഉടവാളും . വീരൻ നിലത്തേയ്ക്ക് വീണ സമയം താൻ നിലത്തേയ്ക്ക് എടുത്ത് ചാടിയപ്പോൾ കയ്യിൽ നിന്ന് തെറിച്ചു പോയതാണവ ….

ഉടനെ തന്നെ അവന്റെ തൊട്ടടുത്തായി മരത്തിൽ ഒരു അമ്പ് കൂടി വന്ന് പതിച്ചു …..

” ആരോ ആക്രമിക്കുകയാണ് , പക്ഷെ ആര് ? ആരായാലും അവൻ നിസ്സാരനല്ല . അമ്പും ഏറ് നക്ഷത്രവും അവൻ ഉദ്ദേശിക്കുന്ന ലക്ഷ്യസ്ഥാനത്ത് തന്നെ വന്ന് പതിക്കുന്നു . ഒന്നുറപ്പ് , എന്നെ ആക്രമിക്കുകയല്ല ഭയപ്പെടുത്തുകയാണ് അവന്റെ ഉദ്ദേശം .. ”

ഇന്ദ്രസേനൻ മനസ്സിൽ ചിന്തിച്ചതും പെട്ടെന്ന് എവിടെ നിന്നോ ഒരു കുതിരക്കുളമ്പടി ശബ്ദം മുഴങ്ങാൻ തുടങ്ങി .