✮കൽക്കി࿐ (ഭാഗം – 21 ) വിച്ചു [ചെകുത്താനെ സ്നേഹിച്ച മാലാഖ ] 831

എനിക്കിപ്പൊ ഒന്നുറപ്പായി , എന്റെ അമ്മ എന്നോട് പറഞ്ഞ അമ്മ പോലും ഒരു നോക്ക് കാണാത്ത ആ മകൻ നിങ്ങളാണെന്ന് , കാളീയനെപ്പോലും വരുതിയിൽ നിർത്തിയ നിങ്ങൾ ചേകവർ മാത്രമല്ല നാഗവംശം കൂടിയാ ജേഷ്ഠന്റെ പിതാവിന്റെ രക്ത പരമ്പര …. ‘

ദൂരേയ്ക്ക് അകന്നകലുന്ന നരസിംഹനെ നോക്കി ഇന്ദ്ര സേനൻ മനസ്സിൽ ചിന്തിച്ചു .

                    ……………………..

കൊട്ടാരത്തിന് പുറത്ത് മതിൽക്കെട്ടിന് താഴെയായി എത്തിയതും കർണൻ തന്റെ വേഗത കുറച്ചു കൊണ്ട് മെല്ലെ മുന്നോട്ട് നടന്നു , കുളമ്പടി ശബ്ദം കാവൽക്കാർ കേൾക്കാതിരിക്കാനായി …. കൊട്ടാരമതിൽ കെട്ടിന് അടുത്തെത്തിയതും കർണൻ മതിലിനോട് ചേർന്ന് നിന്നു , നരസിംഹൻ ഉടനെ തന്നെ അവന്റെ പുറത്തായി കയറി നിന്ന ശേഷം ഇന്നലെ രാത്രി കടന്നത് പോലെ തന്നെ കൊട്ടാരത്തിനകത്തേയ്ക്ക് കടന്നു അതും അംഗ രക്ഷകരുടെ വസ്ത്രം സൂക്ഷിക്കുന്ന അറയിൽ കടന്ന ശേഷം അതും ധരിച്ച് ഒരു അംഗരക്ഷകനെപ്പോലെ .

പക്ഷെ കുമാരിയുടെ അറയിൽ രാജനും രാജ്ഞിയും ഉണ്ടെന്ന കാര്യം വ്യക്തമായതും അവനൊന്ന് പകച്ചു , കാരണം കുമാരിയുടെ അടുത്ത് ചെന്നാൽ മാത്രമേ താൻ ഇത്രയും കഷ്ടപ്പെട്ടതിന് ഫലമുള്ളൂ … അതുകൊണ്ട് നരസിംഹൻ ആരുടെയും ശ്രദ്ധയിൽപ്പെടാതെ മാറി നിന്നു , തക്കതായ അവസരവും കാത്ത് …

സമയം കടന്ന് പോകുന്നത് അവനെ ഭയപ്പെടുത്തി കാരണം വൈദ്യന്മാരും ബാവയും പറഞ്ഞ സമയം സൂര്യോദയത്തിന് മുൻപ് അവസാനിക്കും , അതിന് മുൻപ് അത് ചെയ്തേ പറ്റൂ , എങ്ങനെയും അവളെ രക്ഷിച്ചേ പറ്റൂ ….

അൽപ്പ സമയം കഴിഞ്ഞതും ഒരു അംഗരക്ഷകൻ അനുവാദം ചോദിച്ചു കൊണ്ട് ഉള്ളിലേയ്ക്ക് കയറിപ്പോയി , അൽപ്പം കഴിഞ്ഞതും രാജൻ തിടുക്കത്തിൽ അറ കടന്ന് പുറത്തേയ്ക്ക് പോയി പുറകെ ആ അംഗരക്ഷകനും ….