✮കൽക്കി࿐ (ഭാഗം – 21 ) വിച്ചു [ചെകുത്താനെ സ്നേഹിച്ച മാലാഖ ] 830

” എടാ എനിക്ക് ….. ”

നരസിംഹന്റെ വാക്കുകൾ ഇടറി … അവനൊന്നും പറയാതെ നിസ്സഹായതയോടെ മുന്നോട്ട് നടന്ന് ആ പാറപ്പുറത്തേയ്ക്ക് കയറിയിരുന്നു , എന്ത് ചെയ്യണമെന്നറിയാതെ , അവൾക്ക് എന്താണ് സംഭവിച്ചതെന്ന ആശങ്കയിൽ …

സമയം കടന്ന് പോയി , സൂര്യൻ ആഴിയിൽ മറഞ്ഞ് നേരം ഇരുട്ടിത്തുടങ്ങിയിട്ടും ഒരിടത്തേയ്ക്കും പോകാതെ അവനവിടത്തന്നെയിരുന്നു , കരഞ്ഞ് കലങ്ങിയ കണ്ണുകളുമായി . മനസ്സിൽ മുഴുവൻ ഭയമാണ് ഒപ്പം എന്ത് ചെയ്യണമെന്നറിയാത്ത അവസ്ഥയും …..

മുട്ട് മടക്കി തല കുനിഞ്ഞിരുന്ന് കരയുകയായിരുന്ന നരസിംഹന്റെ തോളിൽ അപ്പോഴാണ് ഒരു കൈ വന്ന് പതിച്ചത് ….

” ആര്യാ …. അവൾ …. അവൾക്കെന്താടാ പറ്റിയത് ? ”

സങ്കടത്തോടെ മുന്നിൽ നിൽക്കുന്ന ആര്യനെ നോക്കി അവൻ ചോദിച്ചു …

” എടാ നീ വിഷമിക്കാതെ , ഞാൻ നിന്നെ എവിടെയൊക്കെ തിരഞ്ഞു … കുമാരിയുടെ ശരീരത്തിൽ ഏതോ വിഷബാധ ഏറ്റതെന്നാ അവിടെ പറഞ്ഞ് കേട്ടത് … കൂടുതലൊന്നും അറിയാൻ പറ്റിയില്ല , കൊട്ടാര വിവരങ്ങൾ എങ്ങനെ പുറത്ത് അറിയാനാ . കുമാരിക്ക് ഒന്നും സംഭവിക്കില്ല , നീ …. വാടാ …. നമുക്ക് വീട്ടിലേയ്ക്ക് പോകാം …… ”

” ഇല്ലെടാ എനിക്ക് അവളെ ഒരു നോക്ക് കാണണം കണ്ടേ പറ്റൂ ….. ”

നരസിംഹൻ സങ്കടത്തോടെ പറഞ്ഞു …

” ടാ അത് ഒരിക്കലും നടക്കാത്ത കാര്യമാ …. കൊട്ടാരത്തിൽ കടക്കുക അതും കുമാരിയുടെ അറയിൽ കയറുക അത് അത്ര എളുപ്പമല്ല , പിടിക്കപ്പെട്ടാൽ കഴുത്തിന് മുകളിൽ തല കാണില്ല …