✮കൽക്കി࿐ (ഭാഗം – 21 ) വിച്ചു [ചെകുത്താനെ സ്നേഹിച്ച മാലാഖ ] 831

” ഈ പച്ചില നിങ്ങളുടെ ശരീരത്തിലെ വിഷം വലിച്ചെടുക്കും ഒപ്പം മുറിവുകളുമുണക്കും .

” ഏയ് നിങ്ങളിതെന്താ ഈ കാണിക്കുന്നേ …. ? എന്റെ ജീവൻ രക്ഷിക്കാനല്ല ജീവനെടുക്കാനാ പറഞ്ഞത് , പറ്റില്ലെങ്കിൽ ആ ഉടവാളിങ്ങെടുത്ത് താ … ഞാൻ സ്വയം ജീവനൊടുക്കിക്കോളാം … ആ അജ്ഞാതൻ എന്റെ കയ്യിൽ നിന്ന് തട്ടിയെടുത്ത ഭൂപട ചിത്രം ഉപയോഗിച്ച് ആ ഇന്ദ്രജാലക്കല്ല് തട്ടിയെടുക്കും . ഞാനിപ്പോൾ രാജദ്രോഹി കൂടിയാ അതിലുപരി കുമാരിയെ രക്ഷിക്കാൻ എനിക്ക് കഴിയില്ല …. ”

ഇന്ദ്രൻ സങ്കടത്തോടെ പറഞ്ഞു …

” കുമാരിക്ക് ഒരപകടവും സംഭവിക്കില്ല . അതിന്റെ പേരിൽ ചേകവർ ജീവൻ നഷ്ടപ്പെടുത്തേണ്ടതില്ല … ”

നരസിംഹൻ അത്രയും പറഞ്ഞ ശേഷം മുറിവുകൾ മുറുക്കെ കെട്ടി എന്നിട്ട് ഇന്ദ്രനെ എടുത്ത് കർണന്റെ പുറത്തിരുത്തി പുറകിലായി അവനും കയറി …

” എന്താ നിങ്ങൾ പറഞ്ഞത് , കുമാരി എങ്ങനെ രക്ഷപ്പെടുമെന്ന് .. ? ”

ഇന്ദ്രൻ അൽഭുതത്തോടെ ചോദിച്ചു …

” മറുപടി ഇപ്പൊ പറയാൻ കഴിയില്ല , ഓരോ നിമിഷവും വിലപ്പെട്ടതാണ് , ഇനിയും വൈകിക്കൂടാ … ഇനി ചോദ്യങ്ങൾ വേണ്ട …. ”

നരസിംഹൻ അതും പറഞ്ഞ് കർണന്റെ കടിഞ്ഞാണിൽ പിടി മുറുക്കി .

                    ……………………..

വേഗതയ്ക്കൊത്ത് സമയവും മുന്നോട്ട് കുതിച്ചു . സൂര്യൻ അസ്തമിച്ച് എങ്ങും ഇരുട്ട് വീണ് തുടങ്ങി . അപ്പോഴേയ്ക്കും അവർ പട്ടണത്തിന്റെ പ്രവേശന കവാടത്തിനടുത്തായി എത്തി …. നരസിംഹനെയും പ്രതീക്ഷിച്ച് കവാടത്തിന് അടുത്ത് നിന്ന ആര്യൻ നിലാവെളിച്ചത്തിൽ അവ്യക്തമായി ദൂരെ നിന്ന് വരുന്ന കർണനെ കണ്ടതും തന്റെ കൈ ഉയർത്തി വീശി ….