✮കൽക്കി࿐ (ഭാഗം – 21 ) വിച്ചു [ചെകുത്താനെ സ്നേഹിച്ച മാലാഖ ] 831

രാജൻ , ഒരു കാര്യം അടിയൻ പറയുന്നത് കൊണ്ട് കോപിക്കുകയോ അവിവേകമോ ഒന്നും ചെയ്യരുത് – ഈ അവസ്ഥയിൽ കുമാരി രണ്ട് ദിനം താണ്ടുക തന്നെ പ്രയാസമാണ് , പ്രതിവിധി ഒന്നും തന്നെ കാണുന്നില്ല …. ”

ആ വൃദ്ധനായ വൈദ്യൻ പറഞ്ഞതും രാജാവും പത്നിയും അലമുറയിട്ട് കരയാൻ തുടങ്ങി ……
അപ്പോഴേയ്ക്കും പുറത്ത് നിന്ന സൈന്യാധിപൻ ആ വൈദ്യനെ പുറത്തേയ്ക്ക് കൂട്ടിക്കൊണ്ട് പോയി …..

” രാജൻ അടിയനൊരു കാര്യം പറയാനുണ്ട് ”

നാരായണ മൂർത്തി തല താഴ്ത്തി നിന്നു പറഞ്ഞതും അയാൾ നിറഞ്ഞൊഴുകുന്ന കണ്ണുകളോടെ തല ഉയർത്തി നോക്കി എന്താ എന്ന അർത്ഥത്തിൽ …

” കുമാരിയെ രക്ഷിക്കാൻ , പഴയ അവസ്ഥയിലേക്ക് മടക്കിക്കൊണ്ട് വരാൻ ഒരു വഴിയുണ്ട് …. ”

നാരായണ മൂർത്തി അത് പറഞ്ഞതും അയാളുടെ കണ്ണുകളിൽ അൽഭുതവും പ്രതീക്ഷയും ചെറുതായി മിന്നിമറഞ്ഞു , രാജരാജേന്ദ്രൻ ഉടനെ തന്നെ പട്ടുമെത്തയിൽ നിന്നെണീറ്റ് നാരയണ മൂർത്തിയുടെ അടുത്തേയ്ക്ക് ചെന്നു …

” മൂർത്തി …. എന്ത് വഴിയാണത് .. പറയൂ … എന്റെ മോളെ രക്ഷിക്കാൻ ഞാൻ എന്താ ചെയ്യേണ്ടത് ….? ”

അയാളുടെ ഉള്ളിലെ പിതൃവാത്സല്യം കേണപേക്ഷിക്കാൻ തുടങ്ങി …

” രാജൻ ഇനി ഒരു വഴിയേ ഉള്ളൂ …
അത് …. അത് …… ഇന്ദ്രജാലക്കല്ല് അതിനു മാത്രമേ ഇനി കുമാരിയെ രക്ഷിക്കാൻ സാധിക്കൂ …. ”

മൂർത്തി പതർച്ചയോടെ അത് പറഞ്ഞതും അയാൾ ഒരു ഞെട്ടലോടെ ഒന്ന് രണ്ട് ചുവടുകൾ പിന്നോട്ട് വെച്ചു ….