✮കൽക്കി࿐ (ഭാഗം – 21 ) വിച്ചു [ചെകുത്താനെ സ്നേഹിച്ച മാലാഖ ] 832

അവൻ വേഗം തന്നെ മരത്തിന്റെ പുറകിൽ നിന്ന് മുന്നിലേയ്ക്ക് തിരിഞ്ഞ് നോക്കി , കറുത്ത നീളമുള്ള ചരടിൽ കോർത്ത ഒരു ആയുധം അത് എവിടെ നിന്നോ വേഗം പറന്ന് വന്ന് നിലത്ത് കിടന്ന ആ ഭൂപട ചിത്രത്തിൽ കുത്തിക്കയറി . ഒടുവിൽ ആ ചരട് വായുവിലേയ്ക്ക് പറന്നുയർന്നു ആ ഭൂപട ചിത്രത്തേയും കൊണ്ട് ….

” ഏയ് ….. ”

അത് കണ്ട ഇന്ദ്രസേനൻ ഉറക്കെ അലറി വിളിച്ചു കൊണ്ട് വേഗം തന്നെ നിലത്തു കൂടി മുന്നിലേയ്ക്ക് ഉരുണ്ട് നീങ്ങിയ ശേഷം തന്റെ വാൾ കയ്യിലെടുത്തു . എന്നിട്ടവൻ വേഗത്തിൽ മുന്നോട്ട് ഓടി …. അൽപ്പം അകലെയായി വേഗത്തിൽ പായുന്ന ഒരു കറുത്ത കുതിര അതിന്റെ പുറത്തായി ശരീരം മുഴുവൻ കറുത്ത വസ്ത്രം ധരിച്ച ഒരാൾ , ആ ഭൂപട ചിത്രം ഇപ്പോൾ അവന്റെ കയ്യിലാണ് …. അവനൊന്ന് പാളി തന്നെ തിരിഞ്ഞ് നോക്കിയ ശേഷം മുന്നിലേയ്ക്ക് കുതിക്കുകയാണ് ….

ഇന്ദ്ര സേനൻ ആ കുതിരയുടെ പുറകേ വേഗത്തിൽ ഓടി …. ഓടുന്നതിനിടയിൽ തന്റെ അരയിലിരുന്ന ചെറിയ കഠാര അവൻ ഊരിയെടുത്ത് ആ കറുത്ത വസ്ത്രം ധരിച്ച കുതിരപ്പുറത്തിരിക്കുന്നവന്റെ നേരെ വീശി എറിഞ്ഞു ….. പക്ഷെ തന്റെ പുറകിൽ തറയ്ക്കാനായി പറന്ന് വന്ന ആ കഠാരയെ അവൻ ( രണദേവ് ) തന്റെ ഉട വാൾ കൊണ്ട് തടുത്ത് വെട്ടി മാറ്റി .

അത് കണ്ട ഇന്ദ്ര സേനൻ ഒന്ന് ഞെട്ടി , കാരണം അവൻ കുതിര ഓടിക്കുകയാണ് ഒപ്പം പുറകിലെത്തിയ കഠാരയുടെ സാമിപ്യവും മനസ്സിലാക്കിയിരിക്കുന്നു , മാത്രമല്ല ഒന്ന് പുറകിലേയ്ക്ക് നോക്കുക പോലും ചെയ്യാതെയാണ് അവൻ അവന്റെ ഉടവാൾ കൊണ്ട് ആ കഠാരയെ വെട്ടി ഇട്ടത് ….