✮കൽക്കി࿐ (ഭാഗം – 21 ) വിച്ചു [ചെകുത്താനെ സ്നേഹിച്ച മാലാഖ ] 830

ബാവ കൊട്ടാരത്തിലേയ്ക്ക് പോയിട്ടുണ്ടെന്നാ നിന്റെ അമ്മ പറഞ്ഞത് ചിലപ്പോ മടങ്ങി എത്തിക്കാണും , പോയാൽ കൂടുതൽ വിവരങ്ങൾ അറിയാൻ പറ്റും . ”

ആര്യനത് പറഞ്ഞപ്പോഴാണ് അവനും ആ കാര്യം ഓർത്തത് .

” നീ പറഞ്ഞത് ശരിയാ , ബാവ ചിലപ്പോ അവളെ നേരിട്ട് കണ്ടിട്ടുണ്ടാകും … നീ വാ … ”

നരസിംഹൻ അതും പറഞ്ഞ് കർണന്റെ പുറത്തേയ്ക്ക് ചാടിക്കയറി , പുറകെ അര്യനും .
അവർ വേഗം തന്നെ അവിടെ നിന്ന് വീട്ടിലേയ്ക്ക് മടങ്ങി , ബാവയോട് വിവരങ്ങൾ ചോദിച്ചറിയാനായി .

                    ……………………..

വൈകുണ്ഡപുരി കൊട്ടാരം.

കുമാരിക്ക് എന്താണ് സംഭവിച്ചത് ? എന്ത് അസുഖമാണ് ബാധിച്ചത് ? അങ്ങനെ ഒന്നും തന്നെ കൊട്ടാരത്തിലെ വൈദ്യന്മാർക്ക് കണ്ടെത്താൻ കഴിഞ്ഞില്ല . ഉടനെ തന്നെ മഹാരാജാവ് സൈന്യാധിപന് നിർദ്ദേശം നൽകി എത്രയും വേഗം പുറം ദേശത്ത് നിന്ന് പ്രഗത്ഭനായ വൈദ്യനെ എത്തിക്കാനായി ….

കൊട്ടാരത്തിലെ കുമാരിയുടെ അറയിൽ ….

അറയിലെ പട്ട് മെത്തയിൽ നവദുർഗ അബോധ അവസ്ഥയിൽ കിടക്കുകയാണ് , ഒന്ന് ചലിക്കുക പോലും ചെയ്യാതെ … ശ്വാസമുണ്ട് എന്നല്ലാതെ മറ്റൊരു പ്രതികരണവും ഇല്ലാത്ത അവസ്ഥ . അവളുടെ തൊട്ടടുത്ത് തന്നെ കരഞ്ഞ് കലങ്ങിയ കണ്ണുകളുമായി വൈകുണ്ഡ പുരിയിലെ രാജാവ് രാജരാജേന്ദ്രനും അദ്ദേഹത്തിന്റെ പത്നി അമയയുമിരുപ്പുണ്ട് , തങ്ങളുടെ ഒരേ ഒരു പുത്രിയ്ക്ക് എന്താണ് സംഭവിച്ചതെന്ന ആശങ്കയിലും സങ്കടത്തിലുമാണവർ .