✮കൽക്കി࿐ (ഭാഗം – 21 ) വിച്ചു [ചെകുത്താനെ സ്നേഹിച്ച മാലാഖ ] 831

ഏറ്റുവും മുന്നിലായി തന്റെ പ്രണയിനിയുടെ ജീവൻ രക്ഷിക്കാൻ ബാവ പറഞ്ഞു തന്ന ഊഹങ്ങൾ വച്ച് ആ ഇന്ദ്രജാലക്കല്ലിനെത്തേടി കർണന്റെ പുറത്ത് നരസിംഹൻ , തൊട്ട് പുറകിലായി രാജാവിന്റെ ആജ്ഞപ്രകാരം ആ ഭൂപട ചിത്രത്തിന്റെ സഹായത്തോടെ ഇന്ദ്രജാലക്കല്ലിനെത്തേടി ചേകവരായ ഇന്ദ്രസേനൻ , ഏറ്റുവും പുറകിലായി തന്റെ ഗുരുവിന്റെ ആഗ്രഹം നിറവേറ്റാൻ ആ ഇന്ദ്രജാലക്കല്ല് തട്ടിയെടുക്കാനായി രണദേവും . അതിന് അവന് ആദ്യം വേണ്ടത് ആ ഭൂപട ചിത്രമാണ് അതിന് ചെയ്യേണ്ടത് ഇന്ദ്ര സേനനെ കൊലപ്പെടുത്തുക എന്ന ദുഷ്കരമായ ദൗത്യവും …..

സമയം കടന്നു പോയി ….
നേരം പുലർന്ന് എങ്ങും സൂര്യന്റെ സ്വർണ്ണ കിരണങ്ങൾ പരന്ന് തുടങ്ങിയിരുന്നു .

ബാവ പറഞ്ഞ് നൽകിയ സൂചനകൾ വച്ച് കാടും മേടും പുഴകളും താണ്ടി നരസിംഹൻ കർണന്റെ പുറത്തിരുന്ന് മുന്നോട്ട് പാഞ്ഞു , കിഴക്ക് ദിശയിലൂടെ …. അവരുടെ യാത്ര മൈലുകളോളം താണ്ടിക്കഴിഞ്ഞിരുന്നു . ഇന്ദ്ര സേനന്റെ തൊട്ട് പുറകെ തന്നെ രണദേവും മുന്നോട്ട് നീങ്ങി .

‘ ഒപ്പത്തിനൊപ്പം നിൽക്കുന്ന എതിരാളിയെ നേരിടേണ്ടത് ശക്തി കൊണ്ടല്ല മറിച്ച് ബുദ്ധി കൊണ്ടാണ് അതിന് ഉപയോഗിക്കേണ്ടത് കുബുദ്ധിയും …. ഏറ്റുവും ഉചിതം ചതി തന്നെ , പതിയിരുന്ന് പുറകിൽ നിന്ന് ആക്രമിക്കുക . ‘

യാത്രയ്ക്ക് തൊട്ട് മുമ്പ് ആത്രേയൻ പറഞ്ഞ വാക്കുകൾ ലംഘിക്കാൻ രണദേവിന് കഴിഞ്ഞില്ല . അവൻ കാത്തിരുന്നു തക്ക സമയത്തിനായി , തന്റെ ഗുരു പറഞ്ഞതു പോലെ പ്രവർത്തിക്കാനായി ….