✮കൽക്കി࿐ (ഭാഗം – 21 ) വിച്ചു [ചെകുത്താനെ സ്നേഹിച്ച മാലാഖ ] 832

വേഗത്തിൽ കുതിക്കുന്ന ആ കുതിരയുടെ ഒപ്പം താനെത്തില്ല എന്ന് ഉറപ്പായതും ഇന്ദ്ര സേനൻ വേഗം തന്നെ തന്റെ ഉടവാൾ അവന് നേരെ വീശി എറിഞ്ഞു , പക്ഷെ ആ കറുത്ത വസ്ത്രം ധരിച്ചവൻ വേഗം തന്നെ തന്റെ നേരെ വന്ന ആ വാളിനെയും വെട്ടി വീഴ്ത്തിയ ശേഷം മുന്നിലേയ്ക്ക് കുതിക്കുന്ന കുതിരയുടെ പുറത്ത് നിന്ന് തിരിഞ്ഞിരുന്നു …

” രാജാവ് കൽപ്പിച്ച കാര്യം നിറവേറ്റാതെ വരുമ്പോൾ ഒന്നുകിൽ നീ സ്വയം ജീവനൊടുക്കും അല്ലെങ്കിൽ രാജാവ് തന്നെ നിന്റെ തലയെടുക്കും അത് കാണാനാ എന്റെ ഗുരു ആശിച്ചത് . പക്ഷെ നിന്നെ വെറുതെ വിട്ടാൽ നീ എനിക്ക് ഒരു തടസ്സമായി മുന്നിൽ വരും വെറിപിടിച്ച നായയെപ്പോലെ , എനിക്ക് ഒരു രണ്ടാമൂഴം എടുക്കാൻ കഴിയില്ല . ”

സ്വയം മനസ്സിൽ ചിന്തിച്ചു കൊണ്ട് ശരവേഗത്തിൽ രണദേവ് ഒന്നിലധികം അമ്പുകൾ ഇന്ദ്ര സേനന് നേരെ പായിച്ചു …

തന്റെ നേരെ മുന്നേ വന്ന രണ്ട് മൂന്ന് അമ്പുകളിൽ നിന്ന് ചാടിത്തിരിഞ്ഞ് അവൻ ഒഴിഞ്ഞ് മാറിയെങ്കിലും പുറകെ വന്ന ഒരു അമ്പ് അവന്റെ നെഞ്ചിൽ തുളയ്ച്ച് കയറി , അതിനും പുറകെ വന്ന രണ്ട് അമ്പുകളിൽ ഒന്ന് കാലിന്റെ തുടയിലും മറ്റൊന്ന് കയ്യിലുമായി തറച്ച് കയറി …. ആ അജ്ഞാതനായ കറുത്ത വസ്ത്രം ധരിച്ചവന്റെ പുറകേ ഓടിയ ഇന്ദ്രസേനന്റെ വേഗത പതിയെ കുറഞ്ഞ് അവൻ നിലത്തേയ്ക്ക് മറിഞ്ഞ് വീണു …

” ഹ …. ഹാ ….. ഹ …..
തുഫ് … ഒരു വലിയ ചേകവർ .
അടിതെറ്റിയാൽ ഏത് ചേകവരും വീഴും ….. മറഞ്ഞിരുന്നുള്ള ആക്രമണം , അതും പുറകിൽ നിന്ന് ആക്രമിക്കുക ക്ഷത്രിയ ധർമ്മമല്ല . പക്ഷെ ഞാൻ ക്ഷത്രിയനല്ല എനിക്ക് ധർമ്മം പാലിക്കേണ്ട ആവശ്യവുമില്ല .