✮കൽക്കി࿐ (ഭാഗം – 21 ) വിച്ചു [ചെകുത്താനെ സ്നേഹിച്ച മാലാഖ ] 831

അവൻ കൊട്ടാരത്തിലെ ഇടനാഴികളിലൂടെ മുന്നോട്ട് നീങ്ങി , പലയിടത്തും തിരഞ്ഞു പക്ഷെ കുമാരിയുടെ അറ കണ്ടെത്താൻ കഴിഞ്ഞില്ല . കാവൽ നിൽക്കുന്ന കാവൽക്കാർ വാല്യക്കാരനാണെന്ന് തോന്നി അവനെ തടഞ്ഞതുമില്ല …..

അൽപ്പം കൂടി മുന്നോട്ട് ചെന്നപ്പോഴാണ് തന്റേതു പോലെ വസ്ത്രം ധരിച്ച മറ്റൊരു വാല്യക്കാരൻ കയ്യിൽ തട്ടത്തിലായി എന്തോ ആഹാര സാധനങ്ങളും കൊണ്ട് മുന്നോട്ട് വരുന്നത് അവൻ കണ്ടത് .

” എങ്ങോട്ടാ …. ”

അയാൾ മുന്നിലെത്തിയതും നരസിംഹൻ തന്റെ ശബ്ദം കടുപ്പിച്ച് ചോദിച്ചു ….

” അ … അത് കുമാരിയുടെ അറയിലേക്ക് … രാജ്ഞിക്കായി കൊണ്ടുപോകുന്ന ആഹാര സാധനങ്ങളാ … ”

ആ വാല്യക്കാരൻ ഭയന്ന മട്ടിൽ പറഞ്ഞു …

” എത്ര സമയമായി പറഞ്ഞിട്ട് , ഉം ഇങ്ങ് താ ഞാൻ കൊണ്ട് ചെന്ന് എത്തിക്കാം … ”

നരസിംഹൻ മനസ്സിൽ തോന്നിയ ഒരു സൂത്രം പ്രയോഗിച്ചു നോക്കി , ശേഷം അവനാ തട്ടം കയ്യിലേയ്ക്ക് വാങ്ങി ….

” ചേട്ടാ ….. വൈകിയതിന് ക്ഷമ ചോദിക്കുന്നു . പുറത്ത് പറയരുത് , ഞാൻ കൊട്ടാരത്തിൽ വേലയ്ക്ക് വന്നിട്ട് രണ്ട് നാൾ ആകുന്നതേ ഉള്ളൂ … പരിചയക്കുറവുണ്ട് …. ”

ആ വാല്യക്കാരൻ ഭയത്തോടെ പറഞ്ഞു …

” ആ …. ശരി … ശരി …. കുഴപ്പമില്ല , ഇനി ആവർത്തിക്കരുത് . ഉം പൊയ്ക്കോ … ”

നരസിംഹൻ പറഞ്ഞതും അയാൾ തിരികെ മടങ്ങി … തന്റെ സൂത്രം ഫലിച്ച സന്തോഷത്തിൽ ആ തട്ടത്തിലെ ആഹാര സാധനങ്ങളുമായി അവൻ മുന്നോട്ട് നടന്നു … അൽപ്പം മുന്നോട്ട് പോയ ശേഷം അവനൊരു കാവൽക്കാരന്റെ മുന്നിലേയ്ക്ക് ചെന്നു .