✮കൽക്കി࿐ (ഭാഗം – 21 ) വിച്ചു [ചെകുത്താനെ സ്നേഹിച്ച മാലാഖ ] 831

പുറത്ത് നിൽക്കുന്ന കാവൽക്കാർ തന്നെ കാണുന്നില്ല എന്ന് ഉറപ്പായതും , അവൻ മുന്നോട്ട് നീങ്ങി പതിയെ തന്റെ കൈ ഉയർത്തി അവളുടെ നെറ്റിയിലൂടെ മുടിയിഴകൾ മെല്ലെ തഴുകി , ശേഷം അവളുടെ വലത് കയ്യിൽ അവൻ മറുക്കെ പിടിച്ചു …

” ഞാൻ വാക്ക് തരുന്നു , കുമാരിയെ ഞാൻ രക്ഷിക്കും , ഞാൻ മടങ്ങി വരും ആ ഇന്ദ്രജാലക്കല്ലുമായി . ഒരാപത്തും വരാതെ കുമാരിയെ ഞാൻ കാക്കും ഇത് നരസിഹന്റെ വാക്ക് , എനിക്കതിന് കഴിഞ്ഞില്ലെങ്കിൽ കുമാരിക്ക് എന്തെങ്കിലും സംഭിവിക്കുന്നതിന് ഒരു നിമിഷം മുൻപെങ്കിലും എന്റെ ജീവൻ എനിക്ക് നഷ്ടമായിരിക്കും . ഞാൻ പോകുന്നു ഇനി അധികം സമയമില്ല . ”

അവൻ അത്രയും പറഞ്ഞ ശേഷം വേഗം തിരിഞ്ഞ് ബാൽക്കണി വഴി പുറത്തേക്ക് ചാടിയിറങ്ങി , ഉള്ളിലേക്ക് കയറിയതുപോലെ അവൻ കൊട്ടാരമതിൽക്കെട്ടിന് പുറത്തേയ്ക്ക് പോയി . തന്നെയും കാത്ത് നിന്ന കർണന്റെ പുറത്തേയ്ക്ക് കയറി അവൻ മുന്നോട്ട് കുതിച്ചു , തന്റെ ബാവ പറഞ്ഞ സൂചനകൾ വച്ച് ആ ഇന്ദ്രജാലക്കല്ലിനെത്തേടി ….

                    ……………………..

കൊട്ടാരത്തിനുള്ളിൽ
സദസ്സിനടുത്തായി …..

” ഇന്ദ്ര സേനാ …. ഇതാണ് ആ ഭൂപട ചിത്രം , ഒരു ദിവസം പൂർണമായും വേണ്ടി വരും പോയി വരാൻ . എത്രയും വേഗം ആ ഇന്ദ്രജാലക്കല്ല് കണ്ടെത്തി ഇവിടെ എത്തിക്കണം … രണ്ട് നാൾ പോലും തികച്ചില്ല , അത്ര മാത്രമാണ് വൈദ്യർമാർ കുമാരിയുടെ ആയുസിന് പറഞ്ഞിരിക്കുന്ന സമയം . ഈ വൈകുണ്ഡ പുരിയുടെ ഭാവി ഇപ്പൊ നിന്റെ കയ്യിലാണ് … ”