??അവൾ രാജകുമാരി-13?? [ ചെകുത്താനെ സ്നേഹിച്ച മാലാഖ ] 509

കാലാസുരൻ തന്റെ കൈ സ്വതന്ത്രമാക്കിയതും ആദിത്യൻ ജീവനറ്റ ശരീരത്തെ പോലെ നിലത്തേയ്ക്ക് വീണു … എന്നിട്ട് അവന്റെ മുന്നിൽ മുട്ടുമടക്കി ഇരുന്നു ..

” നിന്നെ ഇങ്ങനെ കൊല്ലാനല്ല നിന്റെ ജീവൻ അത് എനിക്കാവശ്യമുണ്ട് …. എന്റെ വിജയത്തിന് തുടക്കം കുറിക്കേണ്ടത് നിന്റെ ജീവൻ കൊണ്ടാണ് . എനിക്ക് അമരത്വം നേടേണ്ടത് അതും നിന്റെ ജീവൻ കൊണ്ടാണ് … നിന്റെ ജീവൻ ബലിയായി നൽകി എനിക്ക് ഈ ലോകത്ത് അജയ്യനായി മാറണം . ഞാൻ നിന്നെ വെല്ലുവിളിക്കുന്നു നിന്നെ കൊണ്ട് ഇനി സാധിക്കുമെങ്കിൽ എന്നെ വധിക്ക് …. എന്റെ ജീവനും ആത്മാവും ഇപ്പോൾ എന്റെ ഈ ശരീരത്തിലാണ് , ഇവളുടെ ശരീരത്തിലല്ല …. ”

കാലാസുരൻ ക്രൂരമായ ഭാവത്തോടെ വെല്ലുവിളി മുഴക്കി കൊണ്ട് തിരികെ ഹേമകുണ്ഡത്തിന്റെയടുത്തേയ്ക്ക് നടന്നു … ഹോമകുണ്ഡത്തിന്റെ മുൻപിൽ പോയി ഇരുന്ന ശേഷം അയാൾ അടുത്ത പൂജകൾ ചെയ്യാൻ ആരംഭിച്ചു …

നിലത്ത് കിടക്കുന്ന ആദിത്യന്റെയടുത്തായി ഇരുന്ന ശേഷം അവന്തിക തന്റെ മടിയിലേയ്ക്ക് അവന്റെ മുഖം എടുത്ത് വച്ചു …. അവന്റെ മുഖത്തും തലയിലും പറ്റിപ്പിടിച്ചിരിക്കുന്ന രക്തവും മണ്ണും അവൾ തുടയ്ച്ച്‌ മാറ്റി … അവളുടെ കണ്ണുകളിൽ നിന്ന് ചുടു കണ്ണുനീർ അവന്റെ മുഖത്തേയ്ക്ക് പൊഴിഞ്ഞ് വീണു ….. അവൻ ആ പകുതി അബോധ അവസ്ഥയിലും ശരീരത്തിലെ എല്ലാ വേദനകളും കടിച്ചമർത്തി ഒരു പുഞ്ചിരിയോടെ അവളെ നോക്കി കിടന്നു …..