💞💞അവൾ രാജകുമാരി-13💞💞 [ ചെകുത്താനെ സ്നേഹിച്ച മാലാഖ ] 509

ആദിത്യൻ ദൂരങ്ങൾ താണ്ടി ആ വനത്തിനുള്ളിലേയ്ക്ക് സഞ്ചരിച്ചു. ഒടുവിൽ ദൂരെ ഒരിടത്ത് തീ കൂട്ടിയിട്ട് കത്തിക്കുന്നത് അവൻ കണ്ടു . പക്ഷെ അതിനോടടുത്ത് ചെന്നപ്പോഴാണ് അത് ആ അഗ്നികുണ്ഡമാണെന്ന് അവന് മനസ്സിലായത് ….

” അതെ അന്ന് ഞാൻ കാലാസുരനെ വധിച്ച സ്ഥലം …. അതെ അത് തന്നെ ….. ”

ദൂരെ നിന്ന് കണ്ടപ്പോൾ തന്നെ അവന് ആ സ്ഥലം മനസ്സിലായി … അത് അവൻ മനസ്സിലോർത്തു ….. ആ ഹോമകുണ്ഡത്തിന്റെ മുൻപിലെ കാഴ്ച കണ്ട് അവൻ ഞെട്ടി ….. അന്ന് തകർന്ന് വീണ കാലാസുരൻ പൂജിച്ചിരുന്ന ദുർദേവതയുടെ വിഗ്രഹം ഒരു കേട്പാടും സംഭവിക്കാത്ത രീതിയിൽ പഴയ അവസ്ഥയിൽ തന്നെ ഉയർന്ന് നിൽക്കുന്നു …..

ആ വിഗ്രഹത്തിന്റെ താഴെയായി നിലത്ത് അവൾ അവന്തിക അബോധ അവസ്ഥയിൽ കിടക്കുന്നു …… അവളുടെ രണ്ട് കൈകളും ഒരു കറുത്ത തുണി ഉപയോഗിച്ച് ബന്ധിച്ച അവസ്ഥയിലായിരുന്നു .

അവളെ കണ്ടതും അവന്റെ ഉള്ള് ഒന്ന് പിടഞ്ഞു . . ഒപ്പം മനസ്സിലാകാത്ത ഒട്ടനവധി ചോദ്യങ്ങളും ….

‘താൻ കാണുന്നത് സത്യമോ അതോ സ്വപ്നമോ …
പക്ഷെ അന്ന് നടന്നത് ….. ‘

മനസ്സിൽ നിറഞ്ഞ ചോദ്യങ്ങളും ആശയ കുഴപ്പങ്ങളും ആലോചിച്ച് കൊണ്ട് ആദിത്യൻ അവളുടെ അടുത്തേയ്ക്ക് വേഗം നടന്നു …..

പെട്ടെന്ന് …. ശരീരം മുഴുവൻ കറുത്ത വസ്ത്രം ധരിച്ച ഒരാൾ ബോധമറ്റ് കിടക്കുന്ന അവളുടെ മുന്നിലായി വന്ന് നിന്നു …..