💞💞അവൾ രാജകുമാരി-13💞💞 [ ചെകുത്താനെ സ്നേഹിച്ച മാലാഖ ] 509

” കാലാസുരൻ ”

ആദിത്യൻ തന്റെ മനസ്സിൽ പറഞ്ഞു ….

ഏകദേശം ഏഴടിയോളം ഉയരവും അതിനൊത്ത കറുത്ത നിറമാർന്ന ഉറച്ച ശരീരമുള്ള അമാനുഷിക ശക്തികളുള്ള അയാൾ , കാലാസുരൻ .

കാലാസുരൻ നടന്ന് ആദിത്യൻ വലിച്ചെറിഞ്ഞ ആ വാളിന്റെ അടുത്തെത്തി . എന്നിട്ട് നിലത്ത് കിടന്ന ആ വാളിനെ കയ്യിലെടുത്തു .

” ഹ…… ഹാ …….. ഹാ……… ഹ ഹാ …….

നീ എന്ത് കരുതി എന്നെ പെട്ടെന്ന് വധിക്കാമെന്നോ , നശിപ്പിക്കാമെന്നോ ….. ഹാ……… ഹ .. ഹാ ……. അതിന് ഞാൻ സാധാരണ മനുഷ്യനല്ല …… അസുരമൂർത്തിയെ സേവിക്കുന്ന അസുര ശക്തികൾ നേടിയിട്ടുള്ള മായാവിയാണ് ….. കാലാസുരനാണ് നാം …..ഹ…… ഹാ …….. ഹാ ….

പരകായ പ്രവേശത്തിനായി ഞാൻ വൃദ്ധന്റെ അവസ്ഥയിലേയ്ക്ക് മാറ്റപ്പെട്ടപ്പോൾ നീ കരുതി എന്റെ ശക്തികൾ ഞാൻ പൂർണമായും അഗ്നിയിൽ സമർപ്പിച്ചുവെന്ന് …. ആ തെറ്റിദ്ധാരണയിൽ നീ എന്നെ വധിച്ചു , എന്റെ ശിരസ്സറുത്തു , അതും ഒരു ഭീരുവിനെപ്പോലെ …. ഞാൻ സേവിക്കുന്ന അസുര മൂർത്തിയുടെ വിഗ്രഹം നീ തകർത്തു , എന്റെ മായാവലയത്തിൽ അകപ്പെട്ട് ഞാൻ പറയുന്നത് അതുപോലെ അനുസരിച്ചിരുന്ന എന്റെ പോരാളികളെ എന്നിൽ നിന്ന് എന്റെ ശക്തി വലയത്തിൽ നിന്ന് നീ സ്വതന്ത്രമാക്കി …. പക്ഷെ എന്നെ ഒന്നും ചെയ്യാൻ നിനക്കായില്ല ….

കാലാസുരന് മരണം അതൊരം വിനോദം മാത്രമാണ് , കാരണം എന്റെ ജീവനും ആത്മാവും എന്റെ ഈ ശരീരത്തിലല്ല ഇപ്പോൾ നിലകൊള്ളുന്നത് , അത് മറ്റൊരു ശരീരത്തിലാണ് .