” അവൾ രാജകുമാരി ” എന്ന ഈ കഥ അവസാന ഭാഗങ്ങളിലേയ്ക്ക് കടക്കുകയാണ് , അടുത്ത രണ്ട് പാർട്ടുകൾക്കുള്ളിൽ കഥ അവസാനിപ്പിക്കണം എന്നാണ് കരുതുന്നത് ….. ഇതുവരെ എന്നെ പിന്തുണച്ച പ്രോത്സാഹിപ്പിച്ച എന്റെ എല്ലാ കൂട്ടുകാർക്കും ഹൃദയം നിറഞ്ഞ നന്ദി ….

ഞാൻ ഒരു എഴുത്തുകാരനൊന്നുമല്ല , മനസ്സിൽ തോന്നുന്നത് കുത്തികുറിക്കുന്നു അത്രമാത്രം …. കഥയിലും എന്റെ ഭാഗത്ത് നിന്നും വന്നുപോയി പിഴവുകൾക്ക് ഞാൻ ക്ഷമ ചോദിക്കുന്നു …

സ്നേഹത്തോടെ ……

💞 അവൾ രാജകുമാരി – 13💞
Aval Raajakumaari – 13 | Author : 👼 VICHU[ ചെകുത്താനെ സ്നേഹിച്ച മാലാഖ ] 👼  Previous Part

View post on imgur.com

***************************

ഒടുവിൽ അവർ അവന്തികയുടെ അറയുടെ വാതിൽ തുറന്ന് ശബ്ദമുണ്ടാക്കാതെ അകത്തേയ്ക്ക് പ്രവേശിച്ചു ……… പട്ടു മെത്തയിൽ മയങ്ങി കിടക്കുന്ന അവന്തികയുടെ അടുത്ത് എത്തിയ അവർ കയ്യിൽ കരുതിയ ഒരു പച്ചില അവളുടെ മൂക്കിനടുത്തേയ്ക്ക് കാണിച്ചു . അവൾ അബോധ അവസ്ഥയിലായി എന്ന് മനസ്സിലായതും അതിലൊരുവൻ അവളെ പൊക്കിയെടുത്ത് തോളിലിട്ട ശേഷം വന്ന വഴിയേ കൊട്ടാരത്തിന് പുറത്തേയ്ക്ക് തിരിച്ചു .

കഴുകൻ ഇതെല്ലാം കാണുന്നുണ്ടായിരുന്നു ….. കഴുകൻ അവരെ പിന്തുടർന്നു കൊണ്ടേയിരുന്നു ……. ആ കറുത്ത വസ്ത്രം ധരിച്ചവർ കൊട്ടാരത്തിന് പുറത്ത് എത്തിയ ശേഷം കൊട്ടാരമതിൽ കെട്ടിന് പുറത്ത് നിന്നിരുന്ന അവരുടെ കുതിര പുറത്തേയ്ക്ക് കയറി .

അവന്തികയെ ചുമലിൽ എടുത്ത് കൊണ്ട് പോയയാൾ അവളെ അയാൾ സഞ്ചരിക്കുന്ന കുതിരയുടെ പുറത്തേയ്ക്ക് കയറ്റിയ ശേഷം അയാളും കയറി , എന്നിട്ട് അവർ ചന്ദ്രമംഗലം കൊട്ടാരത്തിന് സമീപത്തെ വനത്തിലേയ്ക്ക് യാത്ര തിരിച്ചു . ഇത് കണ്ട കഴുകൻ അതിവേഗം തിരിച്ച് പറന്നു ആദിത്യന്റെയടുത്തേയ്ക്ക് , അപകടം എന്ന് അവനെ അറിയിക്കാൻ .