💞💞അവൾ രാജകുമാരി-13💞💞 [ ചെകുത്താനെ സ്നേഹിച്ച മാലാഖ ] 509

***************************

” നിനക്ക് തെറ്റ് പറ്റിയിരിക്കുന്നു ആദിസൂര്യാ ….. ഞാൻ ആദ്യമേ നിന്നോട് പറഞ്ഞിരുന്നു ശക്തിയെക്കാൾ കൂടുതൽ ബുദ്ധി ഉപയോഗിക്കണമെന്ന് …. കാരണം നിന്റെ ശത്രു നിസ്സാരനല്ല അവൻ പ്രവർത്തിക്കുന്നത് കുബുദ്ധിയിലൂടെയാണ് …. നീ നിന്റെ ശത്രുവിനെ നിസ്സാരനായി കണ്ടു …..

നീ തെറ്റിദ്ധരിക്കപ്പെട്ടിരിക്കുന്നു ….
ഇനി ആ വീഴ്ച നിന്നിൽനിന്നുണ്ടാകരുത് ….. ചിന്തിക്കുക അതിനു ശേഷം പ്രവർത്തിക്കുക . ശത്രുവിന്റെ ശക്തി തിരിച്ചറിയുക , അതിൽ നിന്ന് ഒഴിഞ്ഞ് മാറുക . ശത്രുവിന്റെ ബലഹീനത തിരിച്ചറിയുക , അതിലൂടെ അവനെ കീഴ്പ്പെടുത്തുക . ”

ഒരശരീരി പോലെ ആദിത്യന്റെ ചെവിയിൽ ഈ വാക്കുകൾ പലയാവർത്തി മുഴങ്ങിക്കൊണ്ടിരുന്നു ….

ഉയരമുള്ള ഒരു മരത്തിന്റെ ശാഖയിൽ ചാരിയിരുന്ന് മയങ്ങുകയായിരുന്ന ആദിത്യൻ ഒരു സ്വപ്നം കണ്ടെന്ന പോലെ ഞെട്ടി ഉണർന്നു …. അപ്പോഴും അശരീരി പോലെ കേട്ട ആ വാക്കുകൾ അവന്റെ ഓർമ്മയിൽ തെളിഞ്ഞ് നിൽക്കുന്നുണ്ടായിരുന്നു …
പക്ഷെ എന്താണ് ആ വാക്കുകളുടെ പൊരുളെന്ന് മാത്രം അവന് മനസ്സിലായില്ല …

പെട്ടെന്ന് ,

“…..ക്ലീ ……… ക്ലീ ……… ക്ലീ ……… ക്ലീ ……… ”

കഴുകന്റെ അസ്വഭാവികമായ ശബ്ദം കേട്ട് ആദിത്യൻ ചിന്തകൾ വിട്ടുണർന്ന് ശബ്ദം കേട്ട ദിശയിലേയ്ക്ക് നോക്കി ……. പെട്ടെന്ന് കഴുകൻ അതിവേഗം അവന്റെ അടുത്തായി പറന്നിറങ്ങി , ശേഷം അത് വീണ്ടും ഉച്ചത്തിൽ ശബ്ദിക്കാൻ തുടങ്ങി …..