✮കൽക്കി࿐ (ഭാഗം – 15 ) വിച്ചു [ചെകുത്താനെ സ്നേഹിച്ച മാലാഖ ] 1308

അവൾ തന്നെ പറ്റിക്കുകയായിരുന്നെന്നും ചതിക്കുകയായിരുന്നെന്നും അവന് തോന്നിത്തുടങ്ങി …. തന്നെ ഒരു വിഢിയാക്കിയ അവളും അവനും ഇനി ജീവനോടെ വേണ്ട എന്ന് ദേവരാജ് തീരുമാനിച്ചു ….. അവളെയും അവനെയും കൊന്നിട്ടേ താനിനി തിരികേ വരൂ എന്ന് കൂട്ടുകാരോട് പറഞ്ഞ ശേഷം ദേവരാജ് അന്ന് രാത്രി അടങ്ങാത്ത ദേഷ്യത്തോടെ കൊട്ടാരം വിട്ടിറങ്ങി അതും ഒറ്റയ്ക്ക് …. ”

” ഇതെങ്ങോട്ടാ അവന്തികേ കഥയുടെ പോക്ക് …. എനിക്കാകെ പേടി തോന്നുവാ … ”

ദക്ഷ ടെൻഷനോടെ ചോദിച്ചു …
ഒരു പുഞ്ചിരി മറുപടിയായി നൽകിയ ശേഷം അവൾ തുടർന്നു ….

” ഹ് ….. ബാക്കി പറയാം ചേച്ചി …..
അന്ന് രാത്രി കഴിഞ്ഞു …. പിറ്റേന്ന് പുലർച്ചെ ഈ നാടിനെ നടുക്കുന്ന രണ്ട് വാർത്തകൾ പെട്ടെന്ന് നാടൊട്ടൊക്കെ പരന്നു …

ഒന്ന് ഹരിനാരായണൻ ശ്രീദേവിയേയും കൂട്ടി ഈ നാട് വിട്ട് ഒളിച്ചോടി പോയിരിക്കുന്നു , രണ്ട് കൊട്ടാരത്തിലെ ഇളയ അവകാശി ദേവരാജ് കൊല്ലപ്പെട്ടു ….

നാട് നിശ്ചലമായ രണ്ട് വാർത്തകൾ …. ശ്രീദേവിയേയും ഹരി നാരായണനേയും കൊല്ലുമെന്ന് പറഞ്ഞ് പോയ ദേവരാജാണ് കൊല്ലപ്പെട്ടത് അതുകൊണ്ട് തന്നെ ദേവരാജിനെ കൊന്നത് ഹരി നാരായണനാണെന്ന് നാട് മുഴുക്കെ പരന്നു ….. ”

” അത് സത്യമാണോ ? ”

ദക്ഷ ഉടനെ ചോദിച്ചു …

” അതറിയില്ല ചേച്ചി …. നാട് മുഴുവൻ ഇപ്പോഴും അങ്ങനെയാ വിശ്വസിക്കുന്നത് , സാധ്യതയും കൂടുതലാണ് .

രാജകുടുംബത്തിലെ ഒരാളാണ് കൊല്ലപ്പെട്ടത് . ഹരിനാരായണനേയും ശ്രീദേവിയേയും തേടി നാട് മുഴുവൻ ഇറങ്ങി എന്ന് തന്നെ പറയാം ആ സമയം , പക്ഷെ അവരെ കണ്ട് കിട്ടിയില്ല .