✮കൽക്കി࿐ (ഭാഗം – 15 ) വിച്ചു [ചെകുത്താനെ സ്നേഹിച്ച മാലാഖ ] 1295

പതിമൂന്ന് വർഷം കൂടുന്തോറും നടക്കുന്ന പതിമൂന്ന് ദിവസത്തെ ഈ ഉത്സവ മഹാസംഗമത്തിൽ എല്ലാ പ്രാവശ്യവും ചേകവർ മനയിലെ ചേകവർ തന്നെ ജയിച്ചു കൊണ്ടേയിരുന്നു എതിരാളികളെ നിലംപരിശാക്കിക്കൊണ്ട് … അതുകൊണ്ട് തന്നെ മറ്റുള്ള കുടുംബക്കാർക്ക് ചേകവർ മന എന്ന് കേൾക്കുമ്പോൾ തന്നെ ചെറിയ ഒരു അതൃപ്തിയാണ് … കിട്ടാത്ത മുന്തിരി പുളിക്കും എന്ന് പറയുന്നത് പോലെ …. ”

അവന്തികയുടെ ആ പറച്ചില് കേട്ടതും ദക്ഷ അറിയാതെ ചിരിച്ചു പോയി …..

” അപ്പൊ മുത്തശ്ശനും ചെറിയ അതൃപ്തി കാണുമായിരിക്കുമല്ലേ …… ? ”

ദക്ഷ ചിരിയോടെ ചോദിച്ചു ….

” അതറിയില്ല …. പക്ഷേ മുത്തശ്ശൻ ഇടയ്ക്ക് പറയുന്നത് കേട്ടു യഥാർത്ഥ എതിരാളി ഇല്ലാതെയാണ് കഴിഞ്ഞ തവണത്തെ ഉത്സവം നടന്നതെന്ന് , ഇത്തവണയും അങ്ങനെ തന്നെയാ എന്ന് …. അതിൽ മുത്തശ്ശന് സങ്കടമുണ്ട് … ”

അവന്തിക മറുപടി പറഞ്ഞു …

” മ് ….. ബാക്കി പറയ് ….. ”

” മ് …. ഓക്കെ …

അങ്ങനെ ആ സമയത്തെ ഉത്സവം കൊടിയേറി ….. ആ സമയം ചേകവർ മനയിൽ അവിടുത്തെ രക്തത്തിൽ പിറന്ന ചേകവർ ഉണ്ടായിരുന്നില്ലല്ലോ …. അതുകൊണ്ട് തന്നെ ബാക്കി ഒൻപത് കുടുംബക്കാരും ഒരുപോലെ ചിന്തിച്ചു എങ്ങനെയും ഈ വർഷത്തെ മത്സരത്തിൽ തങ്ങൾക്ക് ജയിക്കണമെന്ന് …..

അങ്ങനെ ആ ഒൻപത് കുടുംബക്കാരും പുറം ദേശങ്ങളിൽ നിന്ന് പതിനെട്ട് അടവും പഠിച്ച അഭ്യാസികളെ മോഹവില പ്രതിഫലമായി നൽകി കൊണ്ടുവന്നു മത്സരത്തിൽ പങ്കെടുപ്പിക്കാൻ വേണ്ടി …..