✮കൽക്കി࿐ (ഭാഗം – 15 ) വിച്ചു [ചെകുത്താനെ സ്നേഹിച്ച മാലാഖ ] 1308

” ബാക്കി പറ …. ”

ദക്ഷ ഒരു തരം ത്രില്ലോടെ ചോദിച്ചു ….

” മ് ….. അങ്ങനെ കാലം കടന്ന് പോയി . ഈ ശ്രീദേവി ഇല്ലേ അതി സുന്ദരിയായിരുന്നു രാജ്യത്തെ രാജകുമാരിയെക്കാൾ സുന്ദരി , മുഖഭംഗിയും ശരീര ഭംഗിയും കണ്ടാൽ ദേവലോകത്തെ അപ്സരസിനെപ്പോലെ തോന്നും എന്നാ അമ്മ പറഞ്ഞിട്ടുള്ളത് …..

പിന്നെ ചേകവർ മനയിലെ അവകാശിയല്ലേ ആരും മുഖത്ത് നോക്കാൻ പോലും ഒന്ന് ഭയക്കും …..

ചേകവർ ആയി ആ സമയം ആൺ തരികൾ ഉണ്ടായിരുന്നില്ല എങ്കിലും ശേഖരൻ തമ്പി ഒട്ടും മോശക്കാരനായിരുന്നില്ല …. എല്ലാ അടവും വിദ്യകളും സ്വായത്തമാക്കിയ വീരന്മാർ മാത്രമേ ആ കുടുംബത്തിൽ മരുമകനായി വരുമായിരുന്നുള്ളൂ ….

ആ സമയം വൈകുണ്ഡ പുരി രാജകൊട്ടാരത്തിൽ ഏറ്റുവും ഇളയ ഒരു അവകാശി ഉണ്ടായിരുന്നു ദേവരാജ് …. കൊട്ടാരത്തിലെ എല്ലാവർക്കും പ്രീയപ്പെട്ടവൻ , രാജാവിന്റെ ഒരേ ഒരു അനുജൻ – അദ്ദേഹത്തെക്കാളും പത്ത് വയസ്സോളം ഇളപ്പമുള്ള ആനുജനെ അദ്ദേഹം അനുജനായിട്ടല്ല മകനെപ്പോലെ തന്നെയാ കണ്ടത് , അദ്ദേഹത്തിന്റെ തോളിലും നെഞ്ചിലും കിടന്ന് വളർന്നവൻ …. അതുകൊണ്ട് തന്നെ ഒത്തിരി സ്വാതന്ത്ര്യവും വാത്സല്യവും ദേവരാജിന് കിട്ടിയിരുന്നു ….

ദേവരാജിന് ഏറ്റുവും ഇഷ്ടം തന്റെ അമ്മയെക്കാളും ജേഷ്ഠനെയായിരുന്നു , രണ്ടാമതായി അവളും , ചേകവർ മനയിലെ ശേഖരൻ തമ്പിയുടെ മകളെ ശ്രീദേവിയെ …