✮കൽക്കി࿐ (ഭാഗം – 15 ) വിച്ചു [ചെകുത്താനെ സ്നേഹിച്ച മാലാഖ ] 1296

‘” ചേകവർ മന , പേര് പോലെ തന്നെ ഈ തറവാട്ടിൽ പിറക്കുന്ന ആൺ തരികൾ ചേകവർ തന്നെയാണ് , ചാവേറുകൾ . ഒരു തരത്തിൽ ജനിക്കുമ്പോൾ തന്നെ മരണം തലയ്ക്ക് മുകളിൽ നിൽക്കുന്ന ജന്മങ്ങൾ …. പണ്ട് ഇവരുടെ പൂർവ്വികർ ആരോ രാജകുടുംബത്തിന് ചെയ്തു കൊടുത്ത സത്യം , ആ വാക്കാണ് ഒരു തരത്തിൽ ഈ കുടുംബക്കാരെ കാലാകാലങ്ങളായി ഈ ബന്ധനത്തിലാക്കിയത് …..

ചേകവർ മനയിലെ ആൺതരികൾ വിവാഹം കഴിക്കാറില്ല , കാരണം ആൺതരികൾ ആരും മുപ്പത് വയസ്സ് താണ്ടില്ല . ഒന്നുകിൽ ചതിയിലൂടെ കൊല്ലപ്പെടും അല്ലെങ്കിൽ രാജ്യത്തിനും രാജാവിനും വേണ്ടി സ്വയം ജീവൻ ത്യജിക്കും …. ഈ കുടുംബത്തിൽ പ്രാധാന്യം പെൺകുട്ടികൾക്കാണ് , കുടുംബത്തിന്റെ പിന്തുടർച്ച തുടരുന്നത് പോലും അവരിലൂടെയാണ് .

നമ്മുടെ നാട്ടിലൊക്കെ വിവാഹം കഴിഞ്ഞാൽ വധു വരന്റെ വീട്ടിലേക്ക് പോയി ആ കുടുംബത്തിൽ ചേർന്ന് ഒരു അംഗമാകുകയല്ലേ ചെയ്യാറ് പക്ഷെ ഈ കുടുംബത്തിൽ നേരെ തിരിച്ചാണ് . വിവാഹ ശേഷം വരൻ ഈ കുടുംബത്തിലെ അംഗമാകും , പിന്നെ മൂത്ത കാരണവരുടെ കാല ശേഷം ആ മരുമകൻ കുടുംബത്തിന്റെ കാരണവസ്ഥാനത്തെത്തും .

അങ്ങനെ മരുമകനായി വരുന്ന പുരുഷൻ ഭരിക്കുന്ന ഒരു തറവാട് കൂടിയാണിത് …. അതുകൊണ്ട് തന്നെ ഒരു അൽഭുതം പോലെ ഓരോ തലമുറയിലും ഒരു പെൺ തരി ഈ കുടുബത്തിൽ പിറക്കും വംശം നിലനിർത്താൻ വേണ്ടി , പിറക്കുന്ന ആൺ തരികളാകട്ടെ എല്ലാ അടവും മുറയും ആയോധന കലയും പതിനഞ്ച് വയസ്സിനുള്ളിൽ അഭ്യസിച്ച് വീരന്മാരായി മാറും പോരാളികളായി .”