✮കൽക്കി࿐ (ഭാഗം – 15 ) വിച്ചു [ചെകുത്താനെ സ്നേഹിച്ച മാലാഖ ] 1308

അങ്ങനെ രണ്ട് ദിവസത്തെ മത്സരം കഴിഞ്ഞു ശേഖരൻ തമ്പി വിജയിയായിത്തന്നെ നിന്നു …. മത്സരത്തിൽ ജയിച്ച് നിന്ന ചില കുടുംബക്കാർക്ക് എങ്ങനെയും ജയിച്ചേ പറ്റൂ എന്ന വാശി വർദ്ധിച്ചു , അതിനി ചതിയിലൂടെയാണെങ്കിൽ അങ്ങനെ …. ആ രാത്രി അവർ പലതും പദ്ധതിയിട്ടു …

പതിമൂന്നാം ദിവസം , മത്സരത്തിന്റെ അവസാന ദിവസം … കഴിഞ്ഞ എല്ലാ മത്സരങ്ങളിലും വിജയിയായി ചേകവർ മനയിലെ ശേഖരൻ തമ്പി മുന്നേറി …. അങ്ങനെ അവസാന ഘട്ടം , എതിരാളി ഇനി ഒരാൾ മാത്രം …. രണ്ടിലൊരാൾക്ക് അന്തിമ വിജയം സുനിശ്ചിതം ….

അവർ തമ്മിലുള്ള അന്തിമ മത്സരം അത് ഗുസ്തി മത്സരമായിരുന്നു , മൽപ്പിടുത്ത മത്സരം . ഒരു ആയുധവുമില്ലാതെ നിരായുധരായി തങ്ങളുടെ ശക്തി കൊണ്ട് മാത്രം വിജയം നേടുന്ന മത്സരം .

അങ്ങനെ മത്സരം തുടങ്ങി , കാണികൾ എല്ലാവരും അക്ഷമയോടെ നോക്കി നിന്നു …. തന്റെ എതിരാളിയെ ശേഖരൻ തമ്പി നേരിട്ടു കൊണ്ടേയിരുന്നു അതുപോലെ തിരിച്ചും . അങ്ങനെ ഒടുവിൽ ശേഖരൻ തമ്പി ജയം നേടുമെന്ന സന്ദർഭം വന്നതും ആ നിമിഷം അവിടെ ചതി നടന്നു ….. എതിരാളി മിന്നൽ വേഗത്തിൽ മത്സരത്തിന്റെ ചട്ടങ്ങൾ മറികടന്ന് ശേഖരൻ തമ്പിയുടെ ശരീരത്തിൽ മർമ്മ വിദ്യ പ്രയോഗിച്ചു …. അതോടെ ശേഖരൻ തമ്പി ആശക്തനായി , ബലം ക്ഷയിച്ചു . ആ സമയം എതിരാളി നിഷ്പ്രയാസം ശേഖരൻ തമ്പിയെ കീഴ്പ്പെടുത്തിക്കൊണ്ട് മത്സരത്തിൽ ജയിച്ചു …..

ഒരു ഭാഗത്ത് ആർപ്പ് വിളിയും മറുഭാഗത്ത് മത്സരത്തിന്റെ ചട്ടങ്ങൾ തെറ്റിച്ച് ചതിയിലൂടെ ജയം നേടിയെന്ന ആരോപണവും ഉയർന്നു …

മുഴുവൻ ബഹളവും വാക്ക് തർക്കങ്ങളും ….
ഒടുവിൽ വേറെ വഴിയില്ലാതെ വിജയം നേടിയ കുടുംബത്തിലെ കാരണവർ തന്നെ ഒരു ഉപായം ഉന്നയിച്ചു …