✮കൽക്കി࿐ (ഭാഗം – 15 ) വിച്ചു [ചെകുത്താനെ സ്നേഹിച്ച മാലാഖ ] 1295

ചുവരിൽ വച്ചരിക്കുന്ന നശിച്ച് തുടങ്ങിയ പഴയ കാല ചിത്രങ്ങളിലൂടെയും പുരാതന സാധനങ്ങളിലൂടെയും കണ്ണോടിച്ചു കൊണ്ട് അവർ മുന്നോട്ട് നടന്നു , അൽപ്പം മുന്നോട്ട് നടന്നു പോയ അവർ ചെന്ന് പെട്ടെത് ഒരു ഇടനാഴിയിലേക്കായിരുന്നു ഒടുവിൽ അതു വഴി നടുമുറ്റത്തിലേക്കും …. അവിടെ എത്തിയ അവർ ആ നടുമുറ്റത്തേക്കിറങ്ങി , തുളസിയില്ലാത്ത തുളസിത്തറയും ചുറ്റിലും തൂങ്ങി കിടക്കുന്ന പൊടി പിടിച്ച തൂക്ക് വിളക്കുകളിലൂടെയും അവരുടെ കണ്ണൂകൾ ഓടി നടന്നു …..

” എന്നാലും അവന്തികേ …. ഇത്രയും വലിയ ഒരു തറവാടിന്റെ വംശം പോലും നശിച്ചു എന്ന് പറയുമ്പോ എനിക്ക് വിശ്വസിക്കാൻ കഴിയുന്നില്ല …. ”

ദക്ഷ അൽഭുതത്തോടെ പറഞ്ഞു …

” വിശ്വസിക്കണം ചേച്ചി അതാ സത്യം … ”

അവന്തിക അതും പറഞ്ഞ് അവിടെ വരാന്തയുടെ ഓരത്തെ പൊടി ഊതി മാറ്റിയ ശേഷം അവിടെ ഇരുന്നു …

” എന്നാലും എങ്ങനെ …. ? ”

ദക്ഷ അതിശയത്തോടെ ചോദിച്ചു ….

” അതൊരു വലിയ കഥയാ ചേച്ചി പത്തിരുപത്തഞ്ച് വർഷങ്ങൾക്ക് മുൻപുള്ള എനിക്ക് കേട്ടറിവു മാത്രമുള്ള കഥ …. ”

” എനിക്ക് ആ കഥയറിയണം .. ”

ദക്ഷ അവളുടെ അടുത്തിരുന്ന ശേഷം ആ കൈകളിൽ മുറുകെ പിടിച്ചു കൊണ്ട് പറഞ്ഞു ….
അത് കേട്ടതും അവൾ ഒരു നിമിഷം മുന്നിലേയ്ക്ക്
നോക്കിയിരുന്നു …..

” പറയാം ചേച്ചീ , എനിക്കറിയാവുന്നതെല്ലാം പറഞ്ഞ് തരാം …. എല്ലാം ഞാൻ പലരിൽ നിന്നായി കേട്ടറിഞ്ഞ കാര്യങ്ങളാ …..