✮കൽക്കി࿐ (ഭാഗം – 15 ) വിച്ചു [ചെകുത്താനെ സ്നേഹിച്ച മാലാഖ ] 1308

‘ ഇവിടെ ഉള്ള ആർക്കുവേണമെങ്കിലും വിജയിച്ച് നിൽക്കുന്ന ഈ പോരാളിയോട് ഏറ്റ് മുട്ടാം മല്ലയുദ്ധം നടത്താം …. അതിന് തയ്യാറാകുന്നയാൾ മത്സരത്തിൽ ജയിച്ചാൽ ചേകവർ മന ജയിച്ചതായി പ്രഖ്യാപിക്കും തോറ്റാൽ ജയം ഞങ്ങൾക്ക് തന്നെ … ‘

പക്ഷെ ആ ഉപായം ഒരു തന്ത്രമായിരുന്നു …. ചതിയിലൂടെയാണെങ്കിലും ജയിച്ച് നിൽക്കുന്ന ഒരാളോട് ഏറ്റുമുട്ടാൻ ആരും ഒന്ന് ഭയക്കും .

ആ വാക്കുകൾ കേട്ടതും എല്ലാവരും നിശബ്ദരായി ചുറ്റും നോക്കി ….

അപ്പോഴേക്കും തളർന്ന് വീണ തന്റെ അച്ഛന്റെ അടുത്തിരുന്ന് ശ്രീദേവി കരയാൻ തുടങ്ങിയിരുന്നു . തളർന്ന് വീണെങ്കിലും എണീറ്റ് പോരാടാൻ ശേഖരൻ തമ്പി തുനിഞ്ഞു , പക്ഷെ അതിന് കഴിയാതെ അയാൾ വീണ്ടും തളർന്ന് വീണു . ആ അവസ്ഥയും അച്ഛന്റെ അധ്വാനം വിഫലമായതിന്റെ വേദന കൊണ്ടും അവൾ പൊട്ടിക്കരഞ്ഞു ….

അതേ സമയം ആൾക്കൂട്ടത്തിനിടയിൽ നിന്ന് ഒരു കൈ ഉയർന്നു , മത്സരത്തിന് പങ്കെടുക്കാൻ തയ്യാറാണെന്ന രീതിയിൽ ….

അത് കണ്ട എല്ലാവരും വഴി മാറി പുറകിൽ നിൽക്കുന്ന ആളാരെന്ന് നോക്കി , ഒരു ഇരുപത്തിയഞ്ച് ഇരുപത്തെട്ട് വയസ്സ് പ്രായം തോന്നിക്കുന്ന ഒരു യുവാവായിരുന്നു അത് . നീട്ടി വളർത്തിയ തലമുടിയും ശരീരത്തിലെ ഉറച്ച പേശികളും കാണാനഴകുള്ള മുഖവുമൊക്കെയുള്ള ഒരു യുവാവ് …..

ആൾക്കാർ വഴി മാറിയതും അയാൾ മുന്നിലേയ്ക്ക് വന്നു ….

” മത്സരത്തിന് ഞാൻ തയ്യാർ …. ”

ഉറച്ച ശബ്ദത്തോടെയുള്ള ആ വാക്കുകൾ അവിടെ കൂടി നിന്ന എല്ലാവരുടെയും ചെവികളിൽ മുഴങ്ങിക്കൊണ്ടേയിരുന്നു ….