അപരാജിതന്‍ 28 [Harshan] 9779

വേമാവരത്ത് 

ജഗന്നാഥ മന്ദിരത്തിനു മുകളിൽ നിന്നും സുവർണ്ണ നിറമുള്ള നാഗം മെല്ലെ ഇഴഞ്ഞു താഴേക്ക് വന്നു. അവിടെ നിന്നും മണ്ണിലൂടെ അതിവേഗമിഴഞ്ഞു മാളികയുടെ കിഴക്കേവശത്തെത്തി. അവിടെ ഭിത്തിയിൽ പിടിപ്പിച്ചിരുന്ന പൈപ്പുകൾക്കിടയിലൂടെ ഇഴഞ്ഞു മുകളിലേക്ക് കയറി, ആദി കിടക്കുന്ന മുറിയുടെ ജനാലപടിയിലെത്തി. തുറന്നു കിടന്ന ജനാലയിലൂടെ ആ സർപ്പം ഉള്ളിലേക്ക് ഇഴഞ്ഞു കൊണ്ട് ആദി കിടക്കുന്ന കട്ടിൽ കാലിനു മുകളിലൂടെ ഇഴഞ്ഞു കൊണ്ട് കിടക്കയിൽ വന്നിരുന്നു.

ആദിയുടെ ശിരസ്സിനു സമീപം വന്ന ആ സുവർണ്ണ നാഗം പത്തി വിടർത്തിയവനെ നോക്കി.

അന്നേരം

ആദിയുടെ മുറിയിലെ അലമാര തന്നെ തുറന്നു.

അവൻ്റെ ബാഗിൽ സൂക്ഷിച്ചിരുന്ന നാഗമണി പ്രകാശിക്കാൻ തുടങ്ങി.

ആ നാഗം താഴേക്ക് ഇഴഞ്ഞു കൊണ്ട് ആ അലമാരയുടെ മുന്നിലെത്തി.

അലമാരയുടെ ഉള്ളിലേക്ക് കയറി.

അലമാരയുടെ വാതിൽ തന്നെയടഞ്ഞു.

ഉറക്കത്തിൽ ആദി ചിരിക്കുകയായിരുന്നു.

അഞ്ചുവയസ്സുള്ള കുഞ്ഞായ അപ്പു.

അവൻ അചല മുത്തശ്ശിയുടെയും ത്രിലോകരുദ്രൻ മുത്തശന്റെയും കൈ പിടിച്ചു കൊണ്ട് നടക്കുകയാണ്,

വേമവരവും ഗംഗമ്മഗൊണ്ടയും ഹനുമന്താപ്പെട്ടും ഒക്കെ അവർ നടന്നുകാണുകയായിരുന്നു.

അവിടെ അഖാഡ ഭൂമിയിൽ വന്നപ്പോൾ മുത്തശ്ശൻ അവനെ കൈയിലെടുത്തു കൊണ്ട് അവിടെയുള്ള വജ്രാ൦ഗബലി കൽവിഗ്രഹത്തിനു മുന്നിൽ കൊണ്ട് വന്നു നിർത്തി അവനെ തൊഴുവിപ്പിച്ചു.

അതിനു ശേഷം അഖാഡ യിലെ കളത്തിൽ നിന്ന് ആ മണ്ണ് അവന്റെ നെറ്റിയിലും നെഞ്ചിലും പുരട്ടി.

അവിടെ നിന്നും നടന്നുകൊണ്ട് എവിടെഎന്നറിയാത്ത ഒരിടത്തേക്ക് ചെന്നു.അവിടെ പഴയ കാല മാതൃകയിൽ പണിത ഒരു വലിയ ഇരുനില വീട് കണ്ടു.

അപ്പുവിനെയും കൂട്ടി മുത്തശ്ശനും മുത്തശ്ശിയും പടിപ്പുര കടന്നു കൊണ്ടാ വീട്ടിലേക്ക് നടന്നു.

ആ വീട്ടിന്റെ വാതിൽ ആരോ ഉള്ളിൽ നിന്നും തുറന്നു പുറത്തേക്ക് വന്നു.

ജഗന്നാഥൻ

സിവെല്ലൂരി ജഗന്നാഥ റെഡ്ഢി.

മുത്തശ്ശനും മുത്തശ്ശിയും കുഞ്ഞപ്പുവും ജഗന്നാഥനെ നോക്കിചിരിച്ചു കൊണ്ട് അവർ മൂവരും ആ വീടിന്റെ ഉള്ളിലേക്ക് കയറി.

മുത്തശ്ശന്റെ ഒക്കത്തിരുന്നു കൊണ്ട് കുഞ്ഞപ്പു പുറത്തേക്ക് നോക്കി.

പുറത്തെ തുളസി തറയ്ക്ക് സമീപം നിന്നിരുന്ന  ജഗന്നാഥ റെഡ്ഢിയുടെ രുപത്തിന് പരിവര്‍ത്തനം സംഭവിച്ചു തുടങ്ങി.

രൂപമാറ്റം സംഭവിച്ചു കൊണ്ട് ജഗന്നാഥൻഒരു സുവർണ്ണനാഗമായി മാറി.ശിരസിൽ ഉജ്ജ്വലമായ പ്രകാശം പൊഴിക്കുന്ന നാഗമണി ചൂടിയ ഒരു സുവർണ്ണ നാഗം.

ആ ഉറക്കത്തിൽ നിന്നുമുണരാതെ ആദി അവന്റെ ഉറക്കം തുടർന്നുകൊണ്ടിരുന്നു.

(തുടരും) 

 

ആദിയും വേമാവരവും തമ്മിൽ ബന്ധമുണ്ട്.
എന്ന് ഏറെ കുറെ നിങ്ങൾക്കു ഐഡിയ കിട്ടി കാണും
അടുത്ത ഭാഗത്തിൽ അത് ക്ലിയർ ആക്കുന്നതായിരിക്കും.

അടുത്ത പബ്ലിഷിങ് എഡിറ്റിങ് കഴിയുന്ന മുറക്ക്

വരുന്ന തിങ്കൾ / ചൊവ്വ

അടുത്ത രണ്ടു ചാപ്റ്ററുകൾ അല്പം ശോകമായിരിക്കും.
29 & 30. അത് വായിച്ചിട്ട് പിന്നെ പരിഭവപ്പെടാതെയിരിക്കാൻ നേരത്തെ പറഞ്ഞു എന്ന് മാത്രം.

അത് കഴിഞ്ഞാ പിന്നെ എല്ലാം നയനാർമയം.
ശംഭോ മഹാദേവ