അപരാജിതന്‍ 28 [Harshan] 9776

“അല്ല ,,മുത്തശ്ശ ,,എന്‍റെ പെർഫോമൻസ് എങ്ങനെയുണ്ടായിരുന്നു , ആ ക്ളൈമാക്സിലെ ആ ആത്മഹത്യ ഭീഷണി ”

“അതാണ് മോനെ ഏറ്റവും രസമായത് ” ജാനകി ദേവി മുത്തശ്ശി മറുപടി പറഞ്ഞു

“താങ്ക്യു താങ്ക്യു,,മുത്തശ്ശി ,, വേറെയൊരു നിവൃത്തിയും ഇല്ലാതെ ചെയ്തു പോയതാ , അതുപോലെ അല്ലേ നിങ്ങളുടെ ഈ കാന്തന്‍ കാണിച്ചു വെച്ചത്, സ്ക്രിപ്റ്റില്‍ ഇല്ലാതെ ഇങ്ങേര് ആവേശം കയറി ഓരോന്ന് കാട്ടി കൂട്ടി , അതാ ഞാനും ഈ പണി ചെയ്തത് ”

അദ്ദേഹം എല്ലാരു൦ തന്നെ പരിഹാസ൦ കലര്‍ത്തി നോക്കുന്നത് കണ്ടപ്പോള്‍ തെല്ലു നാണത്തോടെ മുഖം താഴ്ത്തി അല്പം മുഖമുയര്‍ത്തി ആദിയെ നോക്കി.

“കള്ളറെഡ്ഡി ,,അങ്ങേരുടെ നോട്ടം കണ്ടില്ലേ “ആദി ചിരിച്ചു കൊണ്ട് പറഞ്ഞു

അത് കൂടെ കേട്ടതോടെ കുടുംബവും ബന്ധുക്കളും നാട്ടുകാരും ചിരി തുടങ്ങി.

പ്രദീക് എല്ലാം അദ്ദേഹത്തിന്റെ ആ നില്‍പ്പു൦ നോട്ടവും കൃത്യസമയത്ത് തന്നെ ക്യാമറയില്‍ ഒപ്പിയെടുത്തു.

അങ്ങനെ ചിരികളും കളിയുമായി ആഘോഷപൂർവ്വം അവർ വിഭവസമൃദ്ധമായ സദ്യ കഴിച്ചു.

എല്ലാവരും ഒപ്പമിരുന്നു കുറെ നേരം സംസാരിച്ചു

ജഗന്നാഥനെയും നിരുപമയെയും വേമാവരത്തിന്‍റെ രാത്രിഭംഗി ആസ്വദിക്കുവാന്‍ വീട്ടുകാര്‍ തന്നെ പറഞ്ഞുവിട്ടു

ആദി കിടക്കുവാനായി മുറിയിലേക്ക് ചെന്നു

അത്ര മേല്‍ ആനന്ദ൦ മനസ് കൊണ്ട് അവന്‍ അനുഭവിച്ചിരുന്നു. മുന്പ് മണിയേട്ടന്റെയും യമുനേടത്തിയുടെയും ജീവിതത്തില്‍ ഇപ്പോള്‍ നിരൂപമയുടെയും ജഗന്നാഥന്റെയും ജീവിതത്തില്‍ . അവന്‍ ഒരു പുഞ്ചിരിയോടെ ആത്മനിര്‍വൃതിയോടെ കണ്ണുകള്‍ അടച്ചു

തനിക്ക് യാതൊരു കെട്ടുപാടുകളും ഇല്ലാത്ത വേമാവരം എന്ന ദേശത്തേക്കു ക്ഷണിച്ചു വരുത്തിയ ജഗന്നാഥനാരായണനെ അവൻ മനസ്സിൽ സ്മരിച്ചു. അവന്‍ മനസ് കൊണ്ട് ജഗന്നാഥനാരായണന് നന്ദിയര്‍പ്പിച്ചു..

അപ്പോഴും അവന്‍റെയുള്ളിലെ നിരവധി ചോദ്യങ്ങൾ ഉയർന്നുകൊണ്ടേയിരുന്നു.

“എന്തുകൊണ്ട് താന്‍ ഇവിടെ വന്നു? വേമാവരവും താനും തമ്മിലുള്ള ബന്ധം ? ഈ ജഗന്നാഥനുമായി എന്ത് ബന്ധം ”

ഉത്തരം കിട്ടുമെന്ന പ്രതീക്ഷയോടെ ആദി കണ്ണുകളടച്ചു കിടന്നു.

<<<<O>>>>