അപരാജിതന്‍ 28 [Harshan] 9777

ആളുകളുടെ ചുമലിൽ ഇരുന്നുകൊണ്ട് ആദി അവനു നേരെ ചൂണ്ടു വിരൽ നീട്ടിയനക്കി. നാവു കടിച്ചു കൊണ്ട് കഴുത്തു അറത്തു കളയുമെന്ന് ആംഗ്യം കാണിച്ചു.മുഖത്ത് അടി കൊണ്ട പോലെ ജഗന്നാഥൻ മുഖമൊന്നു വെട്ടിച്ചു.

ആളുകൾ ആദിയെയും റെഡ്ഢിയെയും ചുമലിലിരുത്തി അവരുടെ സന്തോഷം ആഘോഷിച്ചു കൊണ്ടിരുന്നപ്പോൾ ജഗന്നാഥൻ വണ്ടിയിൽ നിന്നും ചാടിയിറങ്ങി മുണ്ടും മടക്കി കുത്തി ആൾക്കൂട്ടത്തിനുള്ളിലേക്ക് വേഗം നടന്നു വന്നു ആദിയുടെ സമീപമുള്ള ആളുടെ തോളിൽ കൈവെച്ചു ഉയർന്നു ആദിയുടെ പുറം നോക്കി ആഞ്ഞു തൊഴിച്ചു.

ചവിട്ട് കൊണ്ട ആയത്തിൽ ആദി നിലത്തേക്ക് വീണു , വീണയിടത്തു കിടന്നു കൊണ്ടവൻ തിരിഞ്ഞ നോക്കിയ സമയം തന്നെ വീണ്ടും കാലു മടക്കി അവനെ ആഞ്ഞു തൊഴിക്കാനായി ജഗന്നാഥൻ പാഞ്ഞടുത്തു.

ആളുകൾ അവർ തമ്മിലുളള സംഘട്ടനത്തിൽ വേഗം മാറി നിന്നു. ആദി വേഗം തിരിഞ്ഞു കൊണ്ട് ജഗന്നാഥന്‍റെ കാലിൽ മുറുകെ പിടിച്ചു.

ആദി അത്രയും സംയമനം പാലിച്ചിരുന്നു.അവനെ സംബന്ധിച്ചു ജഗന്നാഥനെ വലിച്ചു കീറാൻ ആവതില്ലാഞ്ഞിട്ടല്ല

താനായി ഒരു പ്രശ്നത്തിന് നിൽക്കേണ്ട എന്നവന്‍റെ മനസ് അന്നേരം പറയുന്ന പോലെ അവനു തോന്നി

അവൻ ജഗന്നാഥന്‍റെ കാലു പിടിച്ചു പിന്നിലേക്ക് തള്ളി.ജഗന്നാഥ൯ പിന്നിലേക്ക് മലർന്നടിച്ചു വീണു

അയാൾ വേഗം ചാടി എഴുന്നേറ്റു. അതിനു മുന്നേ ആദിയും എഴുന്നേറ്റിരുന്നു. കാലുമടക്കി ജഗന്നാഥന്‍റെ നെഞ്ച് നോക്കി ചവിട്ടി.

ചവിട്ടിന്‍റെ ശക്തിയിൽ ജഗന്നാഥൻ പിന്നിലേക്ക് തെറിച്ചു അയാളുടെ തന്നെ കാളവണ്ടിയിൽ കെട്ടിയ കറുത്ത കാളകളുടെ മുന്നിൽ ചെന്ന് വീണു.

“എഴുന്നേറ്റു പോടാ,,,,നായെ ,,,:” ആദി അയാളെ നോക്കിയലറി

ദേഷ്യം കൊണ്ട് ജഗന്നാഥൻ വീണ്ടും എഴുന്നേറ്റു

“എന്‍റെ നാട്ടിൽ വന്നു എന്നെ കൈവെക്കാറായോ,,നായെ ,,,,നീയിനി ഉയിരോടെയുണ്ടാകില്ലെടാ ,,നീ ഏതു ബ്രാഹ്മണനായാലും ,,,,,: കോപത്തോടെ ജഗന്നാഥൻ അവനോട് പറഞ്ഞു കൊണ്ട് വീണ്ടും ആക്രമിക്കാൻ നോക്കിയെങ്കിലും അയാളുടെ ഓടിവന്ന സംഘാടകർ അയാളെ പിടിച്ചു നിർത്തി

“വിടടോ ,,,,,,വിടടോ എന്നെ ” എന്ന് ജഗന്നാഥൻ പറഞ്ഞുവെങ്കിലും

“നിങ്ങൾ തമ്മിൽ തർക്കം വല്ലതുമുണ്ടെങ്കിൽ വയൽകളത്തിനു പുറത്തു വെച്ച് തീർത്താൽ മതി ,, ഇത് വിത്ത് വിതക്കേണ്ട മണ്ണാ ,,,ഇതിൽ ചോര വീഴാൻ ഞങ്ങൾ സമ്മതിക്കില്ല ” എന്നുപറഞ്ഞുകൊണ്ടു അവർ അയാളെ മാറ്റിനിർത്തി