അപരാജിതന്‍ 28 [Harshan] 9778

മുന്നിൽ കൊട്ടും കുരവയും മേളവുമായി വാദ്യക്കാർ നടക്കും ഏതാണ്ട് ഇരുപത്തിനടുത്തു വാദ്യക്കാർ , അതിനു പിന്നിലായി ഏറ്റവും മുന്നിൽ സിവെല്ലൂരി ഗോവിന്ദ റെഡ്ഡിയും ഭാര്യ ജാനകി ദേവിയും.

അവർക്കു പിന്നിൽ മക്കളും മരുമക്കളും

അതിനു പിന്നിലായി കുടുംബക്കാരും സുഹൃത്തുക്കളും അവർക്കു പിന്നിലായി ഗ്രാമക്കാരും

പോകും വഴി വഴിയിൽ കാണുന്നവർക്കൊക്കെ മധുരം നൽകും

ഒരുകിലോമീറ്റർ അകലെയുള്ള വേമാവരം ശ്രീകൊണ്ടാലമ്മ അമ്മാവരി ക്ഷേത്ര മൈതാനത്തു വരനും കുടുംബക്കാരും എത്തിചേരും

അതിനു മുന്നേ വധുവിന്‍റെ വീട്ടുകാർ അവിടെയെത്തി അവരെ കാത്തു നിൽക്കും.

ഒരുപാട് അകലെയുള്ള കൃഷ്ണജമ്മപുരം ഗ്രാമത്തിൽ നിന്നുമാണ് നിരുപമയുടെ വരനെ കണ്ടെത്തിയത്.വരന്‍റെ പേര് അനിരുദ്ധൻ, ഒരു കോളേജ് അദ്ധ്യാപകനാണ്.

ആദിക്ക് എല്ലാം പുതിയ അനുഭവങ്ങളായിരുന്നു.

ഓരോ നാടും നാട്ടുകാരും അവിടത്തെ ആചാരങ്ങളും അങ്ങനെയെല്ലാം. അത്യാവശ്യം തെലുഗ് അറിയാവുന്നത് ഈ സമയത്തു ഒരുപാട് ഉപകാരപ്പെടുകയും ചെയ്തതിനാൽ അവൻ മനസ് കൊണ്ട് അവൻ തന്‍റെ തെലുങ്ക൯ കൂട്ടുകാരന്മാരോട് മനസ് കൊണ്ട് നന്ദി പറയുകയും ചെയ്തു.

മേളവും നൃത്തവും ഡപ്പാം കുത്തുമൊക്കെയായി സകലരും ആടിപ്പാടിയാണ് പോകുന്നത്.ഓരോ വഴികളിലും മധുരം വിതരണം ചെയ്തു ആകാശത്തേക്ക് പടക്കങ്ങൾ ഉയർത്തി പൊട്ടിച്ചു കൊണ്ടാണ് അവർ നടന്നു കൊണ്ടിരുന്നത്.

ഒടുവിൽ അവർ ആഘോഷപൂർവ്വം ക്ഷേത്ര മൈദാനിയിൽ എത്തി.

കാൽ മണിക്കൂർ ആയപോളെക്കും വരനും അച്ഛനമ്മമാരും സഞ്ചരിച്ച കാറും അതിനു പിന്നിലായി രണ്ടു ടൂറിസ്റ്റു ബസുകളിൽ അവരുടെ ആളുകളും എത്തി.

വരൻ കാറിൽ നിന്നും ഇറങ്ങി.പുറകെ ബസിൽ നിന്നും ബന്ധുക്കളും

പ്രദീക്നെ കൊണ്ട് പയ്യന്‍റെ കാൽ കഴുകിച്ചു.

സിവെല്ലൂരി ഗോവിന്ദ റെഡ്ഢി പയ്യന്‍റെ കയ്യിൽ ആചാര മര്യാദകളോടെ പൂർണ്ണകുംഭം നൽകി സ്വീകരിച്ചു

ഗോവിന്ദ റെഡ്ഢിയുടെ മൂത്ത മകൻ പയ്യന്‍റെ കഴുത്തിൽ ഒരു ലക്ഷത്തി ഒരു രൂപയുടെ മൂല്യമുള്ള അഞ്ഞൂറു രൂപയുടെ നോട്ടുകൾ കൊണ്ട് ഒരുക്കിയ മാല അണിയിച്ചു .

അപ്പോളേക്കും ആകാശത്തേക്ക് നിരനിരയായി വർണ പടക്കങ്ങൾ ഉയർന്നു വലിയൊരു വെടിക്കെട്ട് തന്നെ നടത്തി.

പയ്യൻ ഗോവിന്ദ റെഡ്ഢിയുടെ കാലിൽ തൊട്ടു തൊഴുതു

അദ്ദേഹം അയാളെ അനുഗ്രഹിച്ചു

അവിടെ നിന്നും എല്ലാവരും ആദ്യം കൊണ്ടാലമ്മ അമ്മാവരി ക്ഷേത്രത്തിനു മുന്നിൽ പോയി തൊഴുതു.

അവിടെ നിന്നും എല്ലാവരും കാൽനടയായി തന്നെ നൂറു മീറ്റർ അകലെ അവർക്കു താമസിക്കാൻ ഏർപ്പാടാക്കിയ മൂന്ന് വലിയ മാളികകളിലേക്ക് നടന്നു.