അപരാജിതന്‍ 28 [Harshan] 9797

“നായ തന്നെയാ ,,, എന്നാലും ഈ നായ , കാലമേറെയായി ഈ നെഞ്ചില് അവളെ കൊണ്ട് നടക്കുന്നത് ,,”

അത് പറഞ്ഞതും അയാളുടെ കരണം നോക്കി ആദി കൈ വീശിയടിച്ചു.

“അമ്മേ ,,,,,” എന്നു പറഞ്ഞുകൊണ്ടയാള്‍ മുഖത്തു കൈയമര്‍ത്തി പിടിച്ചു.

“ഇതവളെ നിന്‍റെ നെഞ്ചില്‍ കൊണ്ട് നടന്നുപദ്രവിച്ചതിന് എന്‍റെ വക , അന്നേ ഞാന്‍ ഓങ്ങി വെച്ചതാ “

അവൻ കിറി നീക്കി അവജ്ഞയോടെ മുഖം തിരിച്ചുകളഞ്ഞു

ജഗന്നാഥന്‍ ചിരിച്ചു , കൊണ്ട് മുഖത്തെ വിയര്‍പ്പും ചോരയും തുടച്ചു.

“ഒന്നും രണ്ടും കൊല്ലമല്ല ,,,ഇരുപത്തി രണ്ടു കൊല്ലമാ ,,എന്‍റെ നീരൂനെ ഞാൻ സ്നേഹിച്ചെ ,,, അത്രേം ഇഷ്ടാ അവളെ ,, അവളെയാ ഞാനീ നെഞ്ചിൽ കൊണ്ട് നടന്നേ ,, ”

ആദി മുഖം ഒരവിശ്വസനീയതയോടെ അയാൾക്ക് നേരെ തിരിച്ചു

അയാൾ ആദിയുടെ കണ്ണിൽ തന്നെ നോക്കി വിതുമ്പി കൊണ്ട് പറഞ്ഞു

“ആ വീടിന്‍റെ ഗേറ്റ്നു മുന്നിൽ ഒരു നായയെ പോലെ, ഞാൻ തെണ്ടി ചോദിച്ചു നീരൂനെ എനിക്ക് തരോന്ന് ,,,അവര് തന്നില്ല ,, ഇത്രേം ഉള്ളിൽ കൊണ്ട് നടന്നയാള് വേറെയൊരാളുടെയാകുമ്പോ ഞാൻ നോക്കി നിക്കണോ ,അതോ സ്വന്തമാക്കാൻ നോക്കണോ ,,” അതയാൾക്ക് മുഴുമിക്കാൻ സാധിച്ചില്ല അപ്പോളേക്കും കരഞ്ഞു പോയിരുന്നു

ആദി വേഗം അയാളുടെ നെഞ്ചിൽ നിന്നും കാലെടുത്ത് മാറ്റി

അവനാകെ എന്ത് ചെയ്യണമെന്ന് ബോധ്യമില്ലാത്ത പോലെയായി

അവൻ പിന്നിലെ ജഗന്നാഥ നാരായണ വിഗ്രഹത്തെയും തന്‍റെ കാൽച്ചുവട്ടിൽ കിടക്കുന്ന ജഗന്നാഥനെയും നോക്കി

“നീ വന്നു കയറിയപ്പോ ആരതി തന്നു നിന്നെ കുടുംബക്കാർ സ്വീകരിച്ചു , നിന്നെ അവിടത്തെ അംഗത്തെ പോലെ കാണാ൯ തുടങ്ങി ,,നീയവിടത്തെയാളായി ,, പെരിയോരുടെ വലം കൈയായി ,, നിന്‍റെ കുലമഹിമ കൊണ്ട് നീ ബ്രാഹ്മണനല്ലേ  “കരച്ചിലടക്കി അയാൾ ചോദിച്ചു

“ഞാൻ ആരാണെന്നു നിനക്കറിയോ ,,,ആ കുടുംബവും ഞാനും തമ്മിലുള്ള ബന്ധമെന്തെന്നു നിനക്കറിയോ ,,പെരിയോര്‍ എന്‍റെ ആരെന്നു നിനക്കറിയോ ?”

അവൻ തല ഇടം വലമാട്ടി ഇല്ല എന്ന് അറിയിച്ചു

“എന്‍റെ അമ്മയുടെ അച്ഛനാ,,, ”

ആ വാക്കുകൾ കേട്ട് പകച്ചിലോടെ ആദിയുടെ കയ്യിൽ നിന്നും തോക്ക് നിലത്തേക്ക് വീണു.

<<<O>>>

അരുവിയിൽ മുഖത്തെയും ദേഹത്തേയും ചോരയെല്ലാം കഴുകി കളഞ്ഞു ആദിയുടെ തോളിൽ മുറുകെ പിടിച്ചു കാല് വലിച്ചു നടന്ന ജഗന്നാഥനെ ആദി അവിടെയുള്ള ഒരു കല്പടവിൽ ഇരുത്തി.

അടുത്തുള്ള കടയിൽ നിന്നും വാങ്ങിയ കുപ്പിവെള്ളം തുറന്നു അവനു നേരെ നീട്ടി

” അവർക്കു ആറു മക്കളല്ലേ ,,അഞ്ചാണും ഒരു പെണ്ണും ,, അതിൽ മൂത്തയാളുടെ മകൾ നിരുപമ , അദ്ദേഹവും ഭാര്യയും മരണപ്പെട്ടു ,, എന്നാണല്ലോ എന്നോട് മുത്തശ്ശൻ പറഞ്ഞത് ”