അപരാജിതന്‍ 28 [Harshan] 9801

അങ്ങനെ ആയിരത്തി എൺപതു ഗ്രാ൦ ഭാരമുള്ള പരമ്പരാഗത സ്വർണ്ണം അണിഞ്ഞു മാത്രമേ വിവാഹ പന്തലിൽ ആ കുടുംബത്തിലെ പെൺകുട്ടി ഇരിക്കുകയുള്ളൂ.

വിവാഹം കഴിഞ്ഞു ആ സ്വർണ്ണം ആമാടപെട്ടിയിലാക്കി നിലവറയിൽ സൂക്ഷിക്കും

പകരം , പെൺകുട്ടി വരന്‍റെ ഗൃഹത്തിലേക്ക് പോകുമ്പോൾ അതിന്‍റെ മൂന്നിരട്ടി സ്വർണ്ണം അണിയിച്ചു പറഞ്ഞയക്കും.

വിവാഹത്തിന്‍റെ തലേന്ന് ആ ആഭരണങ്ങൾ എടുത്തു മുറപ്രകാരം വധുവിന്‍റെ കൈയിൽ പിടിപ്പിച്ചു കൊണ്ട് ദേശകോവിലായ കൊണ്ടാലമ്മ അമ്മാവരി ക്ഷേത്രത്തിൽ കൊണ്ടുപോയി ദേവിയുടെ മുന്നിൽ വെച്ച് സകലവിധ അർച്ചനകളും നടത്തി അത് തിരികെ തറവാട്ടിലേക്ക് കൊണ്ട് വന്നു പൂജാമുറിയിൽ വെക്കും, പിറ്റേന്ന് ആ ആഭരണങ്ങൾ അണിയിച്ചു അവളെ മണ്ഡപത്തിൽ ഇരുത്തും.

എല്ലാവരും കൊണ്ടാലമ്മ ക്ഷേത്രത്തിലേക്ക് പുറപ്പെടാൻ നേരം ജാനകി ദേവി നിലവറയിലേക്ക് ആഭരണമടങ്ങിയ ആമാടപെട്ടി എടുക്കുവാനായി ഇറങ്ങി.

അവരുടെ ഉറക്കെയുള്ള നിലവിളികേട്ട് മക്കൾ വേഗം നിലവറയിലേക്ക് ഇറങ്ങി ചെന്നു.

നിലവറക്കുള്ളിൽ പ്രവേശിച്ചപ്പോളാണ് അവർക്കാ സത്യം മനസിലായത്.

പരമ്പര കൈമാറി വന്ന ആ ആമാടപെട്ടി അവിടെയില്ല.

ആരോ മോഷ്ടിച്ചിരിക്കുന്നു.

കുടുംബം മൊത്തം വിഷയമറിഞ്ഞു.

പരമ്പര സ്വർണ്ണം ധരിക്കാതെ സിവെല്ലൂരി പെൺകുട്ടി വിവാഹം കഴിക്കാൻ പാടില്ല

അത് തലമുറകളായുള്ള നിയമമാണ് .

ചേതനയുടെ വിവാഹത്തിനു ശേഷം രണ്ടു പതിറ്റാണ്ടുകൾ കഴിഞ്ഞു നടക്കുന്ന വിവാഹമാണ്.

ഗോവിന്ദ റെഡ്ഢി മുത്തശ്ശൻ ഒരു തളർച്ചയോടെ തൂണിനോട് ചേർന്നുള്ള തിണ്ണയിൽ ഇരുന്നു പോയി.

നീരുവിനു കൊടുക്കാനായി മുന്നൂറ്റി എട്ടു തോല സ്വർണ്ണം സിവെല്ലൂരി കുടുംബം വാങ്ങിയിട്ടുണ്ട്

പക്ഷെ അത് ധരിച്ചു കൊണ്ട് മണ്ഡപത്തിൽ ഇരിക്കാനാകില്ല.

ആമാട പെട്ടി കഴിഞ്ഞ ദിവസം സന്ധ്യക്കും അവിടെ ഉണ്ടായിരുന്നതാണ് എന്ന് അവിടെ പറഞ്ഞു കേട്ടു.

അതിനർത്ഥം രാത്രി എല്ലാവരും ആഘോഷത്തിലായിരുന്ന സമയത്താകണം മോഷണം നടന്നതും എന്ന് വ്യക്തമാണ് .