അപരാജിതന്‍ 28 [Harshan] 9797

“അവനെന്തു തെറ്റാ ചെയ്തത് ,, അവനെന്നെ പണ്ട് മുതലേ ഒരുപാട് ഇഷ്ടാ,,അതെനിക്കറിയാം, അവന്‍ സമ്പാദിച്ചു കൂട്ടിയതൊക്കെ നിങ്ങൾക്ക് തന്നില്ലേ ,, ഇനി നാഥൂന്‍റെ കയ്യില് ഒന്നൂല്ലാ,,  കുഞ്ഞ് നാള് മുതലേ എനിക്കിഷ്ടാ നാഥൂനേ ” അവൾ കരഞ്ഞു കൊണ്ട് പറഞ്ഞു

ജഗന്നാഥൻ അത് കേട്ട് കണ്ണൊക്കെ നിറഞ്ഞു വിതുമ്പി തുടങ്ങിയിരുന്നു.

“കുഞ്ഞ് നാളിലെ നാഥൂനെ എന്‍റെ അപ്പ ഇവിടെ നിന്ന് തല്ലി ഓടിച്ചപ്പോ ഒരുപാട് ഞാന്‍ കരഞ്ഞിരുന്നു,കൊല്ലങ്ങള്‍ക്ക് ശേഷം നാഥു ഈ നാട്ടില് വന്ന് എന്നോടു ഇഷ്ടം പറഞ്ഞപ്പോളും ഒഴിവാക്കിയത് ചൈതന്യ മാമി ഒരിക്കല്‍ ചെയ്തു പോയത് ഞാനായി ആവര്‍ത്തിക്കാതെയിരിക്കാനാ, അല്ലാതെ എനിക്കിഷ്ടമില്ലാഞ്ഞിട്ടല്ല, ഞാന്‍ പ്രതികരിക്കാത്തത് കൊണ്ട് എന്‍റെ ഇഷ്ടം കിട്ടാനാ നാഥു പലയിടത്തും വെച്ച് എന്നെ ഭയപ്പെടുത്തിക്കൊണ്ടിരുന്നത് , എന്നാലും ഈ കുടുംബത്തിന്‍റെ അഭിമാനം ഇല്ലാതെയാക്കാൻ ഞാനൊന്നും ചെയ്തില്ലല്ലോ ,,നിങ്ങള് പറഞ്ഞ ആളെ തന്നെയല്ലേ മുത്തശ്ശാ ഞാൻ വിവാഹം കഴിക്കാൻ സമ്മതിച്ചതും അതെനിക്ക് ഇഷ്ടമുണ്ടായിട്ടൊന്നുമല്ല ,എന്നാലൂം നിങ്ങളൊന്നും സങ്കടപ്പെടാതെ ഇരിക്കാനാ ,, എല്ലാരും എപ്പോഴും സന്തോഷായിരിക്കാനാ, അതില്‍ കൂടുതല്‍ എനിക്കെന്താ ചെയ്യാനാകാ ? ”

അവൾ വേഗം ജഗന്നാഥന്‍റെ മുഖത്തേക്കു നോക്കി

“നാഥൂ,,, നീ ഒരാളുടെയും കാലു പിടിക്കണ്ട,,,എനിക്ക് വേണ്ടി നീയൊരുപാട് വിഷമിച്ചു ,ഒക്കെയെനിക്കറിയാം , എനിക്കറിയാം ഞാൻ നിന്‍റെയെല്ലാമാണെന്ന് ,എനിക്കും അങ്ങനെ തന്നെയാ ,, പക്ഷെ നമ്മൾ തമ്മിലൊരിക്കലും ചേരില്ല, ചേരാന്‍ പാടില്ല ,,,നമ്മുടെ ഈ കുടുംബത്തിന്‍റെ അഭിമാനം നമ്മളായി ഇല്ലാതെയാക്കണ്ട, എനിക്കാരെയും സങ്കടപ്പെടുത്താന്‍ വയ്യ ,, എന്നെ നീ മറന്നേക്ക് ,നാഥു ”

അവൾ വിഷമത്തോടെ  മണ്ഡപപടിയിൽ ഇരുന്നു , മുഖം പൊത്തി കരഞ്ഞു കൊണ്ടിരുന്നു.

നിരുപമ പറയുന്നത് കേട്ടപ്പോള്‍ അവളുടെ ബന്ധുക്കളുടെ ഉള്ളൂ നൊന്ത് തുടങ്ങി. അവര്‍ പ്രതീക്ഷയോടെ ഗോവിന്ദറെഡ്ഡിയെ നോക്കി , പക്ഷേ അദ്ദേഹം പാറ പോലെ ഉറച്ച മനസുമായി നില്‍ക്കുകയായിരുന്നു.

“അപ്പാ “ എന്നു വിളിച്ച് കൊണ്ട് ഗോവിന്ദ റെഡ്ഡിയുടെ ആണ്മക്കള്‍ അദ്ദേഹത്തിന് സമീപത്തേക്ക് ചെന്നപ്പോള്‍ അദ്ദേഹം കൈയുയര്‍ത്തി അവരെ തടഞ്ഞു

ജഗന്നാഥന്‍ വേഗം നീരുവിന്‍റെ അടുത്തേക്ക് ചെന്നു

അവള്‍ കരയുന്നത് കണ്ട് മറ്റാരേക്കാളും വിഷമമായത് ജഗന്നാഥന് തന്നെയായിരുന്നു

“കരയല്ലേ നീരു ,,, എന്‍റെ ഇഷ്ടം അത് നിനക്കറിയാല്ലോ ,, പണ്ടെന്നെ വിളിച്ചിരുന്ന പോലെ ഇപ്പോളും എന്നെ നാഥൂന്നു വിളിച്ചല്ലോ ,,അത് മതി ,,, അത് മാത്രം മതിയെന്നെ ,,”അവനവളുടെ സമീപം ഇരുന്നു കൊണ്ട് പറഞ്ഞു.