അപരാജിതന്‍ 28 [Harshan] 9797

“നാളത്തെ കാര്യമോർക്കുമ്പോ ഉള്ളില് വല്ലാത്ത നീറ്റലാ ,,, ” അത് പറയുമ്പോൾ ഉള്ളിൽ നിറയുന്ന സകല വേദനയും കടിച്ചമർത്തുന്ന ഭാവം ആ മുഖത്തുണ്ടായിരുന്നു.

ആദി ആ തോക്കു വാങ്ങി മുകളിലേക്ക് നോക്കി കാഞ്ചി വലിച്ചു

തോക്കു പൊട്ടി

ജഗന്നാഥൻ ആദിയെ നോക്കി

“ഉണ്ട കളഞ്ഞല്ലോ ,,?”

“ആ പോട്ടെ ,,,,,” എന്നുപറഞ്ഞു കൊണ്ട് ആദി എഴുന്നേറ്റു

“എനിക്ക് നടക്കാൻ അല്പം പ്രയാസമുണ്ട് , ദേഹത്തിനു നല്ല വേദനയും ,,അതുപോലെയല്ലേ എന്നെ തല്ലിയത് ,,ബുദ്ധിമുട്ടാകില്ലെങ്കിൽ ഇവിടെ കുറച്ചു മാറി എന്‍റെ ഒരു വീടുണ്ട് ,,അവിടെ ഒന്ന് എത്തിക്കാൻ സഹായിക്കുമോ ?” ജഗന്നാഥൻ ചോദിച്ചു

ആദി ഒന്നും മിണ്ടാതെ ജഗനാഥനെയും താങ്ങി മുകളിലേക്ക് നടന്നു.

ഒരു ഓട്ടോ പിടിച്ചു

പതിനഞ്ചു മിനിറ്റ് യാത്ര ചെയ്തു ഒരു വലിയ വെണ്ണക്കൽ മാളികയുടെ മുന്നിൽ വന്നിറങ്ങി

ആദി ജഗന്നാഥനെ ഓട്ടോയിൽ നിന്നും ഇറങ്ങാൻ സഹായിച്ചു.

ആ മാളിക സിവെല്ലൂരി മാളികയെക്കാൾ വളരെ വളരെ വലുതായിരുന്നു.

“വരൂ ,,ഇവിടെ വരെ വന്നതല്ലേ ഒന്ന് കയറിയിട്ട് പോകാം ” എന്നു ജഗന്നാഥൻ പറഞ്ഞു

“നാളെ അപ്പോ ,,നീരൂന്‍റെ കല്യാണമാണല്ലേ ,,,” എന്നുപറഞ്ഞു കൊണ്ട് ചിരിച്ചു.

“അതേ , അവള്‍ ആഗ്രഹിക്കുന്ന ആളോടൊത്ത് ” ആദി മറുപടി പറഞ്ഞു.

മാളികയുടെ പുറത്തെ മതിലിൽ പേര് എഴുതിയ ഇടം സ്റ്റിക്കർ കൊണ്ട് മറച്ചു വെച്ചിരിക്കുകയായിരുന്നു.

ജഗന്നാഥൻ കൈ എത്തിച്ചു ആ സ്റ്റിക്കർ അടർത്തി മാറ്റി

അതിൽ ഗോൾഡൻ കളറിൽ “nirupama ” എന്ന് എഴുതിയിരിക്കുന്നു.

ആദി അത് കണ്ടൊന്നതിശയിച്ചു

“നീരു എന്‍റെ ജീവിതത്തിലേക്ക് വരുമ്പോ അവൾക്കു സമ്മാനമായി പണികഴിപ്പിച്ചതാ ,, ” നഷ്ടബോധത്തോടെ ജഗന്നാഥൻ പറഞ്ഞു

അപ്പോളേക്കും ഗേറ്റ് തുറന്നു

ഉള്ളിലേക്ക് ടൈൽസ് വിരിച്ച ഒരു ചെറിയ റോഡ്

ആദി ജഗന്നാഥനെ പിടിച്ചു കൊണ്ട് ഉള്ളിലേക്ക് നടന്നു

കൊട്ടാരത്തിനു സദൃശമായ മാളിക

പുറത്തു ലോണും കുളവും ഉദ്യാനവും എന്ന് വേണ്ട എല്ലാ വിധ സൗകര്യങ്ങളും