✮കൽക്കി࿐ (ഭാഗം – 22 ) വിച്ചു [ചെകുത്താനെ സ്നേഹിച്ച മാലാഖ ] 973

” നിനക്ക് നന്ദിയല്ല വേണ്ടത് മറിച്ച് എന്റെ ഒരു കെട്ടിപ്പിടിത്തം മാത്രം , അല്ലേടാ …. എന്നാ പോയാലോ …. ”

കർണന്റെ നെറ്റിയിലൂടെ ഒന്ന് തലോടിയ ശേഷം നരസിംഹൻ അവന്റെ പുറത്തേക്ക് ചാടി കയറി , ശേഷം അവർ വീട്ടിലേയ്ക്ക് തിരിച്ചു …

                    ……………………..

കൊട്ടാരത്തിനുള്ളിൽ ….

മഹാരാജനും രാജ്ഞിയും ഭയം വിട്ടകന്ന
സന്തോഷത്തിൽ കുമാരിയുടെ അടുത്ത് തന്നെ ഇരിക്കുകയാണ് ആ അറയിൽ …. സംഭവിച്ച കാര്യങ്ങൾ എല്ലാം അറിഞ്ഞ നവദുർഗ്ഗ നിറഞ്ഞ് തുളുമ്പുന്ന കണ്ണുകളോടെ തന്റെ അമ്മയുടെ തോളിൽ ചാരിയിരിക്കുകയാണ് , അവർ അവളെ തന്റെ അടുത്തേയ്ക്ക് ചേർത്ത് പിടിച്ചിട്ടുമുണ്ട് , മഹാരാജനാകട്ടെ ആശ്വാസത്തോടെ സന്തോഷത്തോടെ തന്റെ മകളുടെ അടുത്തിരുന്ന് വാത്സല്യപൂർവ്വം അവളുടെ തലമുടി തഴുകുകയാണ് . വിവരമറിഞ്ഞ് മന്ത്രി ചക്രപാണിയും കൊട്ടാരം വൈദ്യൻ
നാരായണ മൂർത്തിയും അവിടെ എത്തിയിരുന്നു …

ചക്രപാണിയുടെ മുഖത്ത് എന്തെന്നില്ലാത്ത സന്തോഷമാണ് . തന്റെ സ്വന്തം മകളെ കരുവാക്കിയാണ് ആ നീചനായ ആത്രേയൻ ഈ കളി കളിച്ചത് . പക്ഷെ ഇപ്പോൾ തന്റെ മകൾ സുരക്ഷിതയാണ് അതിനെല്ലാമുപരി കുമാരിയും ജീവിതത്തിലേയ്ക്ക് മടങ്ങി എത്തിയിരിക്കുന്നു ഒരു പോറൽ പോലും ഏൽക്കാതെ … അയാളുടെ കണ്ണുകളും സന്തോഷം കൊണ്ട് നിറഞ്ഞു . മനപൂർവ്വമല്ലെങ്കിലും സാഹചര്യത്തിന്റെ സമ്മർദ്ദം മൂലം താനും ഈ തെറ്റിന് കൂട്ട് നിന്നു എന്ന കുറ്റബോധം അയാളെ അലട്ടി , പക്ഷെ ഒന്നും തുറന്നു പറയാൻ അയാൾ ഒരുങ്ങിയില്ല മറിച്ച് ഭയന്നു ആ ആത്രേയനെ അത്രമാത്രം …..