✮കൽക്കി࿐ (ഭാഗം – 22 ) വിച്ചു [ചെകുത്താനെ സ്നേഹിച്ച മാലാഖ ] 971

മാത്രമല്ല അയാളുടെ കൈവശമാണ് ഞാൻ കൊടുത്തയച്ച ഭൂപട ചിത്രമുള്ളത് , അത് കൈവശമില്ലാതെ ഒരാൾ കാളീയ ഗുഹയിൽ കടന്നാൽ കാളീയന്റെ ദംശനത്താൽ മരിക്കും എന്നതും സത്യമാണ് പിന്നെ എങ്ങനെ , അങ്ങേയ്ക്ക് തെറ്റ് പറ്റിയെന്ന് തോന്നുന്നു ….

” ഹ് ….. ഹ ….. ഹ …. ”

മഹാരാജന്റെ മറുപടി കേട്ട് ആ വൃദ്ധനായ വൈദ്യൻ ഒന്ന് ചിരിച്ചു …..

” തെറ്റ് പറ്റിയത് എനിക്കല്ല തിരുമനസ്സേ കാലത്തിനാണ് …. കുമാരിയുടെ ജീവൻ രക്ഷിച്ചത് ആ ഇന്ദ്രജാലക്കല്ലിന്റെ ശക്തിയിലൂടെ തന്നെയാണ് , പക്ഷെ ആ ഇന്ദ്രജാലക്കല്ലിന്റെ ശക്തിയല്ല മറിച്ച് അത് മുഴുവനായി കുമാരിയുടെ ജീവനുമായി ലയിച്ച് ചേർന്നിരിക്കുന്നു …. ”

” എന്ന് വച്ചാൽ …? ”

എല്ലാം കേട്ട് നിന്ന നാരായണ മൂർത്തി സംശയത്തോടെ ചോദിച്ചു .

” എന്ന് വച്ചാൽ . കാളീയ ഗുഹയിൽ നൂറ്റാണ്ടുകളായി മറഞ്ഞിരുന്ന ആ ഇന്ദ്രജാലക്കല്ല് ഇപ്പോൾ കുമാരിയുടെ ശരീരത്തിലാണുള്ളത് , കുമാരിയുടെ ശരീരത്തിലെ ജീവനാണ് ആ കല്ലിപ്പോൾ , കുമാരിയുടെ പ്രാണനുമായി അത് ലയിച്ച് ചേർന്നിരിക്കുന്നു …. ഇനി ഒരു നാൾ ആ കല്ല് പഴയ രൂപത്തിലേക്ക് മടങ്ങി വന്നാൽ അന്ന് കുമാരിയുടെ മരണമാണ് …. ”

ആ വൃദ്ധനായ വൈദ്യരുടെ വാക്കുകൾ കേട്ട് എല്ലാവരും ഒന്നു നടുങ്ങി …..

” സൂക്ഷിക്കണം തിരുമനസ്സേ …. കാരണം കാളീയന്റെ സംരക്ഷണ വലയത്തിൽ ഇതുവരെ ഇന്ദ്രജാലക്കല്ല് കൈ മോശം വരാതെ സംരക്ഷിക്കപ്പെട്ടു എന്നാൽ ഇനി കാവലിന് കാളീയനില്ല …