✮കൽക്കി࿐ (ഭാഗം – 22 ) വിച്ചു [ചെകുത്താനെ സ്നേഹിച്ച മാലാഖ ] 972

സൂര്യനും സൂര്യകാന്തിയും തമ്മിൽ പ്രണയിക്കും , പക്ഷെ അവരൊരിക്കലും ഒന്നിക്കില്ല എന്ന് ആരേക്കാളും നന്നായി അവർക്ക് തന്നെ അറിയാം …. കുമാരീ എനിക്ക് അങ്ങയോട് തോന്നിയ പ്രണയം അതെന്റെ ഉള്ളിലെ ഒരു തരം ഭ്രാന്താണ് അത് ഈ ശരീരത്തിൽ ജീവനുള്ള കാലം മുഴുവൻ അങ്ങനെ തന്നെ ഉണ്ടാകും .

അതൊരിക്കലും നമ്മളെ ഒരുമിപ്പിക്കില്ല , കാരണം അങ്ങ് ജനിച്ചത് കൊട്ടാരത്തിലാണ് രാജകുമാരിയായി ഈ ഞാൻ ജനിച്ചത് എവിടെ എന്ന് എനിക്കറിയില്ല ഒരു പോറ്റമ്മയും പിത്യ സ്ഥാനത്ത് ബാവയും മാത്രമേ എനിക്കുള്ളൂ … ഒരു തരത്തിൽ അനാഥനാണ് ഞാൻ , സ്വന്തമെന്ന് പറയാനാരുമില്ലാത്തവൻ , വംശവും ജാതിയും ഏതെന്ന് പോലുമറിയാത്ത ജന്മം . പാടില്ല , എന്നെ സ്വീകരിക്കുന്നത് സ്വന്തം രാജ്യത്തെ വഞ്ചിക്കുന്നതിന് തുല്യമാ , അത് വലിയ പ്രശ്നങ്ങൾക്ക് വഴി വയ്ക്കും ചിലപ്പോ ഈ രാജവംശത്തിന്റെ പതനത്തിന് തന്നെ കാരണമായേക്കും .

ഒരിക്കലും ഒരുമിക്കാൻ വിധിയില്ലാത്തവരാ നമ്മൾ . മറക്കണം എല്ലാം … ഉള്ളിൽ തോന്നിയതെല്ലാം ഒരു ദു:സ്വപ്നമാണെന്ന് കരുതി മറക്കണം …. ഒഴിവാക്കുകയല്ല , മറിച്ച് നല്ല വഴികാട്ടിത്തരുകയാണെന്ന് കരുതിയാൽ മതി ….”

മനസ്സ് വിങ്ങുന്നുണ്ടെങ്കിലും മുഖത്ത് ഒരു പുഞ്ചിരി വരുത്തിക്കൊണ്ട് അവൻ പറഞ്ഞു …. അവളാകട്ടെ ഒരു വാക്ക് പോലും മറുപടി പറയാതെ സങ്കടം നിറഞ്ഞ മുഖത്തോടെ അവനെ നോക്കിയ ശേഷം അവന്റെ വലത് കൈയിൽ പിടിച്ചു …. ആ കയ്യിലേക്ക് രുദ്രാക്ഷ മാല വച്ചു കൊടുത്ത ശേഷം അവൾ ഒന്നും പറയാതെ തിരിഞ്ഞ് നടന്നു … തൊട്ടപ്പുറത്തായി നിന്ന തന്റെ കുതിരയുടെ പുറത്തവൾ കയറിയ ശേഷം അവനെ ഒന്ന് തിരിഞ്ഞ് നോക്കി ….