✮കൽക്കി࿐ (ഭാഗം – 22 ) വിച്ചു [ചെകുത്താനെ സ്നേഹിച്ച മാലാഖ ] 973

” നിങ്ങൾക്ക് ഈ നദി ഓർമ്മയില്ലേ ….. ആ തകർന്ന് കിടക്കുന്ന പാലം ഓർമ്മയില്ലേ … മറക്കാൻ വഴിയില്ല , മറന്നിരുന്നെങ്കിൽ എന്നെ രക്ഷിക്കാൻ വീണ്ടും വരില്ലായിരുന്നല്ലോ …. ?

അന്ന് ആ പാലം തകർന്ന് എല്ലാവരും വെള്ളത്തിലേയ്ക്ക് വീണപ്പോൾ നീന്താനറിയാത്ത ഞാൻ ആ നദിയുടെ അടിത്തട്ടിലേയ്ക്ക് മുങ്ങിത്താണപ്പോൾ ഓർമ്മ മങ്ങുന്നതിന് മുൻപ് , കണ്ണുകളടയുന്നതിന് മുൻപ് ഞാൻ അവസാനം കണ്ടത് നിങ്ങളുടെ മുഖമാ ഈ കണ്ണുകളാ … ബോധം നഷ്ടമാകുന്നതിന് മുൻപ് ഞാൻ കണ്ടതാ നിങ്ങളുടെ കണ്ണുകളിലുള്ള ആ പ്രത്യേകതരം തിളക്കം . ഒടുവിൽ ബോധം വീണ സമയം ഞാൻ തിരക്കി എന്നെ രക്ഷിച്ചതാരാണെന്ന് പക്ഷെ അതാർക്കും അറിയില്ലായിരുന്നു , ആ അവസ്ഥയ്ക്കിടയിൽ നിങ്ങളെ ആരും ഒന്ന് ശ്രദ്ധിക്കുക പോലും ചെയ്തു കാണില്ല എന്ന് എനിക്ക് മനസ്സിലായി …

പിന്നീടുള്ള ദിവസങ്ങൾ , രാത്രിയിലെ സ്വപ്നങ്ങളിൽ മുഴുവൻ നിറഞ്ഞ് നിൽക്കുന്നത് അന്ന് കണ്ട ഈ കണ്ണുകളായിരുന്നു … പതിയെ പതിയെ അതിന്റെ തീവ്രത വർദ്ധിച്ചു , ആ സ്വപ്നങ്ങൾ എന്റെ ഉറക്കം കെടുത്തിത്തുടങ്ങി . ഒടുവിൽ ആ മുഖം ഒന്ന് കൂടി കാണണം എന്ന് ഉറപ്പിച്ച നിമിഷം മുതൽ ഞാൻ ഇതുപോലെ വേഷം മാറി തെരുവിലേക്കിറങ്ങി എന്റെ തോഴിമാരുടെ സഹായത്തോടെ നിങ്ങളെ ഒന്ന് കൂടി കാണാൻ …

തിരക്കേറിയ ഒരു പാട് സ്ഥലങ്ങളിൽ ഞാൻ തിരഞ്ഞു , ഈ പട്ടണം മുഴുവൻ ഞാനലഞ്ഞു പക്ഷെ കണ്ടെത്താൻ കഴിഞ്ഞില്ല … ഒടുവിൽ വർഷങ്ങൾ കഴിഞ്ഞ് അവസാന പ്രതീക്ഷയും അവസാനിച്ചു എന്ന് തോന്നിയ സമയം അന്നാ ഞാൻ നിങ്ങളെ ഈ തിളക്കമുള്ള കണ്ണുകളെ വീണ്ടും കണ്ടത് .