✮കൽക്കി࿐ (ഭാഗം – 22 ) വിച്ചു [ചെകുത്താനെ സ്നേഹിച്ച മാലാഖ ] 972

ആ മുഖം മറച്ച് എത്തിയ ആളാണ് ബോധമില്ലാതെ മരണവും കാത്ത് വഴിയിൽ കിടന്ന എന്നെ രക്ഷിച്ചതും മുറിവുകളിൽ മരുന്നുകൾ വയ്ച്ചതും പട്ടണവാതിൽക്കൽ വരെ എന്നെ എത്തിച്ച ശേഷം ഇവിടെ കൊട്ടാരത്തിൽ എത്തി കുമാരിയെ രക്ഷിച്ചതും … രാജൻ , അയാൾ എനിക്ക് വാക്ക് തന്നിരുന്നു കുമാരിയെ രക്ഷിക്കുമെന്ന് , അതിനു വേണ്ടിയാണ് അയാൾ ഇന്ദ്രജാലക്കല്ല് കണ്ടെത്തിയതെന്നും . ”

ഇന്ദ്രസേനന്റെ വാക്കുകൾ കേട്ടതും എല്ലാവരും ഒരുപോലെ ഞെട്ടി ….

” അപ്പോൾ …. എന്നോട് നുണ പറഞ്ഞ് എന്നെ ഇവിടുന്ന് മാറ്റിയ അയാളാണോ എന്റെ മകളെ രക്ഷിച്ചത് … ? അയാൾ മുഖം മറച്ചിരുന്നു , അംഗരക്ഷകന്റെ വേഷത്തിലാണ് എത്തിയതും … ”

രാജ്ഞി അതിശയത്തോടെ പറഞ്ഞു …. കുമാരിയാകട്ടെ ഇതൊക്കെ കേട്ട് ആകെ ആശയകുഴപ്പത്തിൽ ദീർഘമായി ചിന്തിച്ചിരിക്കുകയാണ് ….

” ഇന്ദ്രാ …. ആരാ അത് ? ഇത്രയും കഷ്ടപ്പെട്ട് ജീവൻ പണയം വെച്ച് എന്റെ മകളെ രക്ഷിക്കാൻ മാത്രം അയാൾക്കെന്ത് നേട്ടം …. ? മാത്രമല്ല ആ മുഖം മറച്ചയാൾ എങ്ങനെയാണ് കാളീയനെ മറികടന്ന് ആ ഇന്ദ്രജാലക്കല്ല് സ്വന്തമാക്കിയത് … താങ്കൾക്ക് അറിയാവുന്നതല്ലേ ആ ഭൂപട ചിത്രം കൈവശമില്ലാതെയാണ് ഒരാൾ കാളീയന് മുന്നിലെത്തുന്നതെങ്കിൽ അയാളെത്ര വലിയ പോരാളിയും അഭ്യാസിയുമാണെങ്കിലും മരണം ഉറപ്പാണ് പിന്നെ എങ്ങനെ ? ”

രാജൻ സംശയത്തോടെ ചോദിച്ചു .

” രാജൻ അയാളാരെന്ന് എനിക്കറിയില്ല , ആ മുഖവും ഞാൻ കണ്ടില്ല , അയാൾക്കെന്താണ് നേട്ടമെന്നുമറിയില്ല . പക്ഷെ കാളീയനെ അയാൾ എങ്ങനെ മറികടന്നു എന്ന് അയാളുടെ കണ്ണുകൾ എനിക്ക് കാണിച്ചു തന്നു ….