✮കൽക്കി࿐ (ഭാഗം – 22 ) വിച്ചു [ചെകുത്താനെ സ്നേഹിച്ച മാലാഖ ] 972

അപ്പോഴാണ് മുന്നിലൂടെ നടന്നു പോയ ഒരു പത്ത് പന്ത്രണ്ട് വയസ്സുള്ള ആൺകുട്ടി തന്നെ നോക്കി ചിരിക്കുന്നത് അവൻ കണ്ടത് , അവൻ കൈ ഉയർത്തിക്കാണിച്ച ശേഷം മുന്നിലേക്കോടി അപ്പോഴാണ് അവന്റെ കയ്യിൽ തന്റെ രുദ്രാക്ഷമാലയിരിക്കുന്നതവൻ കണ്ടത് …

” ഏയ് …. ടാ …. നിൽക്ക് …. ”

നരസിംഹൻ ഉറക്കെ വിളിച്ചു കൊണ്ട് ആ തിരക്കിനിടയിലൂടെ ആ കുട്ടിയുടെ പുറകേ ഓടി …. ആ ആൺകുട്ടിയാകട്ടെ ഒരു ചിരിയോടെ തിരക്കിനിടയിലൂടെ ചുറ്റിത്തിരിഞ്ഞ് മുന്നിലേക്ക് ഓടുകയാണ് പുറകെ നരസിംഹനും … അവൻ വേഗത്തിൽ ആ തെരുവിലെ തിങ്ങി നിറഞ്ഞ കെട്ടിടങ്ങൾക്കിടയിലൂടെ മുന്നോട്ട് കുതിച്ചു …..
ചെറിയ ചെറിയ ഇടവഴികളിലൂടെ ചുറ്റിത്തിരിഞ്ഞ് ഓടുന്ന അവന്റെ പുറകെ നരസിംഹനും ഓടി , എന്നാൽ കുറച്ച് ദൂരം പിന്നിട്ടതും പിന്നെ അവനെ കണ്ടില്ല ….

” ഇവനിതെവിടെപ്പോയി ….. ഇവനെന്തിനാ വിലയില്ലാത്ത എന്റെ രുദ്രാക്ഷമാല തട്ടിപ്പറിച്ചത് … ഇനി ബാവ ചോദിച്ചാൽ ഞാനെന്ത് മറുപടി പറയും … ”

നരസിംഹൻ മനസ്സിൽ ചിന്തിച്ചു കൊണ്ട് ഓരോ കോണിലും നോക്കി മുന്നോട്ട് നടന്നു ….

പെട്ടെന്നാണ് ആരോ ഒരു വശത്ത് നിന്ന് അവന്റെ കയ്യിൽ കയറി പിടിച്ച് അവനെ ഒരു ആളൊഴിഞ്ഞ കെട്ടിടത്തിനകത്തേയ്ക്ക് വലിച്ചിട്ടത് …. ആ കെട്ടിടത്തിനകത്തേയ്ക്ക് വേച്ച് വീഴാൻ പോയ അവൻ കാലുറപ്പിച്ച് നിന്നുകൊണ്ട് തിരിഞ്ഞ് നോക്കി , ആരാണ് തന്നെ പിടിച്ച് ഉള്ളിലേയ്ക്ക് കയറ്റിയതെന്ന സംശയത്തോടെ …