✮കൽക്കി࿐ (ഭാഗം – 22 ) വിച്ചു [ചെകുത്താനെ സ്നേഹിച്ച മാലാഖ ] 973

തിരിഞ്ഞ് നോക്കിയതും തന്റെ മുന്നിലായി
നിൽക്കുന്ന ഒരു യുവതിയെയാണ് അവൻ കണ്ടത് , സാധാരണ രീതിയിൽ വസ്‌ത്രം ധരിച്ചിരുന്ന അവൾ കണ്ണുകൾ മാത്രം പുറത്ത് കാണുന്ന രീതിയിൽ മുഖം മറച്ചിരിക്കുകയാണ് . മനോഹരമായി വരച്ചെഴുതിയിരിക്കുന്ന ആ കണ്ണുകൾ കണ്ടതും അവന് ഏറെ പരിചിതമുള്ള ഒരാളെപ്പോലെയാണ് തോന്നിയത് ….

” എന്താ ഇത് തേടി വന്നതാണോ …. ? ”

അവൾ ഉറക്കെ ചോദിച്ചു കൊണ്ട് കൈ ഉയർത്തിക്കാണിച്ചു , അവളുടെ കയ്യിൽ അവന്റെ ആ രുദ്രാക്ഷമാലയുണ്ടായിരുന്നു , പക്ഷെ ആ ശബ്ദം കേട്ടതും അവനൊന്ന് നടുങ്ങി . ശരീരത്തിലെ സകല രോമങ്ങളും എഴുന്നേറ്റ് നിന്നതു പോലെ , മുന്നിൽ നടക്കുന്നത് വിശ്വസിക്കാൻ കഴിയാത്തതു പോലെ ….

” കു ….. കുമാരി …… രാജകുമാരി ? ”

ഒരു പതർച്ചയോടെ കണ്ണും മിഴിച്ചു നിന്നാണ് അവനത് ചോദിച്ചത് പക്ഷെ ആ ചോദ്യം കേട്ട അവളും ഒന്ന് ഞെട്ടി ഇയാൾ എങ്ങനെ തന്നെ മനസ്സിലാക്കി എന്ന സംശയത്തോടെ ?
അവൾ പതിയെ തന്റെ മുഖം മറച്ചിരുന്ന തുണി അഴിച്ചു മാറ്റി ….

” ശബ്ദം കേട്ട് എന്നെ മനസ്സിലാക്കിയല്ലോ ? നരസിംഹൻ , അല്ലേ …. ? മരണം മുന്നിൽ കണ്ട് കിടന്ന എന്നെ രക്ഷിച്ചിട്ട് നിങ്ങൾ മുഖം മറച്ച് രക്ഷപ്പെട്ടാൽ ഞാൻ കണ്ടുപിടിക്കില്ലെന്ന് കരുതിയോ ? ”

അവളത് ചോദിച്ചതും അവന്റെ കണ്ണുകൾ വിടർന്നു …

” അ ….. അത് …. ഞാ … ഞാൻ … കുമാരിക്കെങ്ങനെ ….? ”

അതിശയത്തോടെ അതിലുപരി പരിഭ്രമത്തോടെ അവൻ തിരക്കി …..