✮കൽക്കി࿐ (ഭാഗം – 22 ) വിച്ചു [ചെകുത്താനെ സ്നേഹിച്ച മാലാഖ ] 973

ആ തിരക്കിനിടയിലും അവന്റെ ശബ്ദം അവിടെ മുഴുവൻ മുഴങ്ങി , ഉടനെ തന്നെ ഒരു വശത്ത് നിന്ന് ആ തിരക്കിനെ മറികടന്ന് കർണൻ അവന്റെ അടുത്തേയ്ക്ക് ഓടി വന്നു , ഉടനെ തന്നെ നരസിംഹൻ അവന്റെ പുറത്തേയ്ക്ക് ചാടിക്കയറി മുന്നോട്ട് കുതിച്ചു …

നവദുർഗ്ഗ കുതിരയുടെ പുറത്ത് കയറി നേരെ പോയത് വനാതിർത്ഥിക്കടുത്തുള്ള ആ നദിയുടെ കരയിലേക്കായിരുന്നു …. അവിടെ എത്തിയതും നദിയുടെ തീരത്തായി പച്ച പുതച്ച ചെറിയ താഴ്‌വരയുടെ താഴെ നിൽക്കുന്ന ഒരു വലിയ മരത്തിന് ചുവട്ടിലായി അവൾ ചെന്നിരുന്നു .

അപ്പോഴേയ്ക്കും നരസിംഹനുമവിടെ എത്തി … വിജനമായ ആ പ്രദേശത്ത് മരത്തണലിലിരിക്കുന്ന അവളെ കണ്ടതും അവനങ്ങോട്ട് നീങ്ങി ഉള്ളിൽ ചെറിയ ഭയം നിറഞ്ഞ പരിഭ്രമത്തോടെ .

” കുമാരീ …. ? ”

പുറകിൽ നിന്ന് അവൻ വിളിച്ചതും അവൾ തിരിഞ്ഞു നോക്കി , ഭാവം മനസ്സിലാവാത്ത അവളുടെ ആ നോട്ടം കണ്ടതും .

” ക്ഷമിക്കണം അങ്ങനെ വിളിക്കരുതല്ലേ …. ? എന്നാൽ ദുർഗ്ഗ , അത് മതി . ”

അവൻ ഭയത്തോടെ പതിയെ പറഞ്ഞതും അവൾ പൊട്ടിച്ചിരിച്ചു അവന്റെ അപ്പോഴത്തെ മുഖഭാവം കണ്ട് … അവൾ വേഗം നിലത്ത് നിന്ന് എണീറ്റ ശേഷം അവന്റെ നേർക്ക് തിരിഞ്ഞു , മുഖാമുഖം . അവന്റെ തൊട്ടടുത്തായി പരിഭ്രമത്തോടെയുള്ള അവന്റെ ശ്വാസോച്ഛ്വാസം പോലും തന്റെ ശരീരത്തിൽ വന്ന് പതിക്കുന്നത് അനുഭവിച്ചറിയുന്ന രീതിയിൽ അവൾ അവന്റെ മുഖത്തേയ്ക്ക് ആ കണ്ണുകളിലേയ്ക്ക് തന്നെ നോക്കി നിന്നു .