?? അവൾ രാജകുമാരി-11?? [ ചെകുത്താനെ സ്നേഹിച്ച മാലാഖ ] 570

” നിന്റെ ഈ ജന്മത്തിൽ നീ ചെയ്ത് തീർക്കേണ്ട കർമ്മങ്ങളിൽ ഒന്നു മാത്രമാണ് കാലാസുരനെ വധിച്ച് ആ നാടിന് രക്ഷ കൊടുക്കുക എന്നത് …… നൂറ്റാണ്ടുകളായി അവൻ ഇരയെ കാത്തിരിക്കുന്ന വന്യമൃഗത്തെപ്പോലെ നിന്നെയും കാത്ത് ആ ഉൾവനത്തിൽ കഴിയുകയാണ് . അവൻ തന്നെ നിന്നെ അവിടെ എത്തിക്കാൻ നിന്റെ പ്രീയപ്പെട്ടവളെ പിടിച്ചു കൊണ്ട് പോയി …… ഈ ആയുധം അതിന്റെ ലക്ഷ്യം പൂർത്തിയാക്കി കഴിഞ്ഞാൽ അതിനുശേഷമുള്ള ഒരു അമാവാസി ദിനത്തിൽ നീ തന്നെ ഇവ ഭൂമിയിൽ എത്തിചേർന്ന സ്ഥലത്ത് നിർമ്മിച്ച ആ സൂര്യ ക്ഷേത്രത്തിൽ സമർപ്പിക്കുക ……

നിന്റെ നിയോഗം നീ പൂർത്തീകരിച്ചു കഴിഞ്ഞാൽ പിന്നെ നീ ആദിത്യനല്ല …. ആദി സൂര്യനാണ് , പിന്നെ നീ സ്വതന്ത്രനാണ് നിനക്കു തന്നെ നിന്റെ ജീവിതം തിരഞ്ഞെടുക്കാം , നിന്റെ ചിന്തകൾക്കനുസരിച്ച് സ്വയം പ്രവർത്തിക്കം .. പക്ഷെ സൂര്യഗിരിയുടെ രാജപദവി അത് നിനക്ക് അന്യമായിരിക്കും കാരണം നിന്റേതെന്ന് പറയാൻ ഇപ്പോൾ അവിടെ ആരും തന്നെയില്ല ….. പിന്നെ ബാക്കിയൊക്കെ വിധിയാണ് തടുക്കാനാകാത്ത വിധി …… ”

ആദിത്യൻ ആ സന്യാസി പറയുന്ന ഓരോ വാക്കുകളും സസൂക്ഷ്മം ശ്രവിച്ചു ……

” നീ നേരിടാൻ പോകുന്നത് ഒരു സാധാരണ മനുഷ്യനെയല്ല ….. ഒപ്പം , അവന്റെ മാന്ത്രിക വലയത്തിൽ അകപ്പെട്ട് അവനെ അനുസരിച്ച് നിൽക്കുന്ന നൂറുകണക്കിന് പോരാളികളും അവനൊപ്പം ഉണ്ട് ….. പക്ഷെ നീ തനിച്ചാകില്ല നിനക്ക് വേണ്ട സഹായം യഥാ സമയത്ത് നിന്നെ തേടിയെത്തും …… നമ്മെക്കാൾ ശക്തിയുള്ളവനെ ശക്തി മാത്രംകൊണ്ട് നേരിടരുത് അത് വിഢിത്തരമാണ് …… അവിടെ ശക്തിയെക്കാൾ കൂടുതൽ ബുദ്ധി ഉപയോഗിക്കുക …. ഇതാ ഇത് നിനക്കുള്ളതാണ് ….. ഈ കഴുകൻ നിന്നെ എന്റെ അടുക്കൽ എത്തിച്ചതു പോലെ അവന്റെ അടുക്കലേയ്ക്കും നിന്നെ ഇവൻ എത്തിക്കും …. ”