?? അവൾ രാജകുമാരി-11?? [ ചെകുത്താനെ സ്നേഹിച്ച മാലാഖ ] 570

ചന്ദ്രമംഗലം കൊട്ടാരം

സമയം ഏറെ കഴിഞ്ഞിട്ടും അവന്തികയെ തട്ടികൊണ്ട് പോയവരെ കുറിച്ച് ഒരു സൂചനയും ലഭിക്കാത്തതിനാൽ കോപത്തോടെ തന്റെ അറയിൽ ചിന്തിച്ചിരിക്കുകയായിരുന്നു അഗ്നി മിത്രൻ . പെട്ടെന്ന് അനുവാദം ചോദിച്ച ശേഷം ഒരു പടയാളി അവന്റെ അറയിലേയ്ക്ക് കയറി വന്നു .

” യുവരാജൻ …. കുമാരിയെ പിടിച്ചു കൊണ്ട് പോയതിനെ പറ്റി ഒരു സൂചന ലഭിച്ചിട്ടുണ്ട്. ”

അറയിലേയ്ക്ക് കയറി വന്ന ആ പടയാളി അഗ്നിമിത്രനോട് പറഞ്ഞു .

” എന്താണ് ? എന്താണ് ലഭിച്ച സൂചന ?…….. ”

അൽപം ശബ്ദമുയർത്തി അഗ്നിമിത്രൻ ചോദിച്ചു.

” യുവരാജൻ അത് ………….. കുമാരിയെ കിഴക്ക് ദിശയിലേക്കാണ് പിടിച്ചുകൊണ്ട് പോയത് എന്നാണ് അറിയാൻ കഴിഞ്ഞത് ……. ”

പടയാളിയുടെ വാക്കുകൾ കേട്ട അഗ്നിമിത്രൻ ഒരു നിമിഷം എന്ത് ചെയ്യണമെന്നറിയാതെ സ്തംഭിച്ച് നിന്നു പോയി ….. അതിനു ശേഷം അഗ്നിമിത്രൻ തന്റെ പിതാവായ ആത്രേയന്റെ അടുക്കലേയ്ക്ക് ചെന്നു …… കൂടെ ആ പടയാളിയും .

” പിതാവെ ….. അവന്തികയെ പിടിച്ചു കൊണ്ട് പോയത് കിഴക്ക് ദിശയിലേക്കാണെന്ന് അറിവ് ലഭിച്ചിട്ടുണ്ട് ……. ”

അഗ്നി മിത്രൻ പിതാവായ അത്രേയനോട് പറഞ്ഞു . അത് കേട്ടതും ആത്രേയൻ ഒരു നിമിഷം ആലോചിച്ചു പതിയെ ആ മുഖത്ത് ഭയം വന്ന് നിറഞ്ഞു …. …..

” പുത്രാ …. കിഴക്ക് ദിശ എന്ന് പറയുമ്പോൾ വനാസുരവംശജർ ജീവിക്കുന്ന വനം കിഴക്കേ ദിശയിലാണ് , ആ കാര്യം അൽപം ഗൗരവമായി തന്നെയെടുക്കണം , കാരണം വനാസുര വംശജരെ നേരിടുക അത് അസാധ്യമാണ് …. എന്തായാലും കിഴക്ക് ദിശയിൽ തിരച്ചിൽ ശക്തമാക്കണം ….. ഈ കാര്യം സൈന്യത്തെ അറിയിക്കൂ…….”

ആത്രേയൻ പറഞ്ഞു .